Kerala sorkar office nung bomb lendong atalok

Malappuram (Kerala), November 01 (Agencies) : Mongulbar nikongdang Kerala collector office kima nung bomb lendong ka atalok saka tasüba mesüra teraksaba osangbo kecha mali, ta police-i shiogo.
District Collector office nung teti inyakyim ka ama senden amentsü aruba sorkar tenzüker ka gari nung pressure cooker nung bomb sepbanger yutsü, ta police-i ashi.
Iba bomb pokli tesem tonga arusang, Malappuram Superintendent of Police Debesh Kumar Behra-i, ibai ‘pressure cooker bomb’ lir aser iba lendong nung gari raksaba dak alaka tanga teraksaba mesüra tasüba aser yiruba osang kecha mali, ta osangbenertem dang ashi.
Iba tatalokba bushisüngdangtsü atema special investigation team (SIT) ka tentettsü ta ashidang, pai, “Lendong atalokba tesem nung ‘The Base Movement’ ta zülua aliba shidi ka ngua lir. Iba telok yagi tesüiba mapangtem nunga Nellore, Mysuru aser Kollam nung iba ama mapa inyaka liasü,” ta ashi.
Behra-i, iba bomb nung ammonium nitrate amshiba putetogo, ta ashi.
Yaküm Kollam nung iba mesükba lendong atalokdanga tang lendong atalokba mapang alisang, District Collector A.Shinemol-isa iba district nung kasa mapa ama liasü.