Kerala & Tamil Nadu sorkartemi Cyclone Ockhi atema teyari agütsür

Chennai, December 6 (Agencies): Bodbarnü Kerala aser Tamil Nadu sorkartemi Cyclone Ockhi ajanga takoksa bener arutsürtem yaritsü atema osang balala metetdaktsüogo.
Kerala nung nisung 33,000 aser Tamil Nadu nung nisung 2,800 shi ka iba yipru ajanga timtem ajurua lir. Iba yipru ajanga nisung 39 taküm samaogo aser 167 mangu bushiteper, ta sorkar ketdangsertemi ashi.
Tamil Nadu, Kerala aser Lakshadweep nung rescue operations balala inyakdar aser ketdangsertemi nisung samartem bushiteper.
Maneni, Tamil Nadu nung angopur 74 aser Kerala nung 93 samar bushiteper, ta ketdangser kati ashi.
Cyclone Ockhi nung tasür kibong shia nem sen lakh 20 aser teti atema lemtar nem sen lakh 5 agütsütsü ta Kerala chief minister, Pinarayi Vijayan-i ashi.
Taruba hopta ka atema angopur shia nem anogo nung sen 60 aser parnok tanur nem sen 45 allowance agütsütsü. Maneni ita ka atema tzükümlen alirtem nem angati ration agütsütsü, ta Vijayan-isa metetdaktsü.
“Angopudang amshiba osettsüset samartem nem teyari agütsütsü. Tasürtem aser samar mangurtem chirnurtem nem angati education & job training agütsütsü” ta paisa shise,.
“Tzükümlen aliba police nung nisung 200 anioktsü aser taküm samaba angopurtem indang tanurtem nem mezüng maongka agütsütsü” ta Vijayan-isa shisem.
Tamil Nadu nunga state sorkari ashiba agi, Kanyakumari district nung kiojen 4,000 dak tema raksa aser Cyclone Ockhi ajanga takoksa angur nem sen lakh 41 tashi teyari agütsüogo.
Cyclone Ockhi ajanga kiojen 1,687 ajunga raksa aser 2,814 tashi tera raksa, ta revenue secretary B Chandramohan-i osangbener dang ashi.
Ki ajunga raksaba kibur 325 nem parnok indang bank accounts nung sen 5,000 enoktsüogo aser tera raksaba ki kibur 1,002 nem sen 4000 enoktsü, ta paisa ashi.