Kerber-i Porsche Grand Prix nung takok angu

Germany, April 24 (Agencies) : Angelique Kerber-i Porsche Grand Prix asayamong nung ano shilua takok nguogo. Deobarnü final asaya nung lai 6-4, 6-0 agi Laura Siegemund madak takok angu.
Siegemund-i tetenzükdang kanga junga asaya-a 3-0 aküm, ajisüaka Kerber-i meyiper la dang nungi tajungba asayateta mezüngbuba set ji minute 39 tsüngda nung 6-4 agi akok.
Australian Open nung champion, Kerber-i asaya tenzüker minute 81 tsüngda nung iba asaya takok angu. La asoba yimti nung tan ya la mezüng asayarba lir.
“Iba tang ya tajungbabo majurutsü südi. Ni tetenzükdang tera tashi mait tenzük, ajisüaka khen lir tajungba asayatet iba takok anguba atema ni kanga pelar,” ta Kerber-i ashi.
Iba takok ya la asoshi takok toku buba lir aser tan title ka shilua agubabo tan ya mezüng lir.
“Ni kanga aniogo aser ni tan dang tajungba asayatettsü kü dak tashi lir,” ta arishi küm 28 tain Siegemund-i ashi.