Kerber-i Sydney International kokogo

Sydney, Aenjeti 13:- Germany tsür Angelique Kerber-i Sydney International asayamung nung Ashleigh Barty madak takok anguba sülen takok marok nung tebang mesepba noksa nung angur.

Sydney, Aenjeti 13 (Agencies): Australian Open asayatsü hopta ka dang lia Germany tsür Angelique Kerber-i Australia tsür Ashleigh Barty straight set nung koka Sydney International tennis asayamung kokogo.
Taoba mapang nung world No.1 ya Barty asoshi kanga tetokteper tashitait ka liasü aser lai 6-4, 6-4 agi ayong ayonga koka Melbourne nung taküm küm atema mezüngbuba Grand Slam nung shilem agitsüba asoshi tali tashi itshiogo.
2016 küm US Open akokba sülen Kerber atema iba ya mezüngbuba takok asütsü aser Barty tena tsüngda asemben asayaba nung la asoshi tanabenbuba takok lir.
Taoba küm Kerber No. 1 jenjang nung tenzük aser No. 22 nung tembang. La 2018 küm asentenshir asayaba nung tang tashi khen danga tamakok ngua mali.
“Ni hopta peyong kanga junga asayaa aruogo. Final nung Ash den asaya kanga melarabo masü sü, saka asaya nung tongtibang mapangtem nung ni kanga junga asayatet. Ni taküm küm atema mezüngbuba asayamung koktetba atema kanga pelar. Iba ya tetenzük dang lir saka ni tanaben junga asaya tenzüker ta bilemer aser asaya ajak ka khea ka khen ta tali temulung agüja asayatsü merangdar,” ta Kerber-i ashi.
Iba takok ya la asoshi WTA title 11buba lir aser taküm Australian Open akoktsü imlar rongnung laa ka lir.
2005 küm Alicia Molik-i Sydney International final nung Sam Stosur akokba sülen taküm mezüngbuba iba asayamung nung Australia tsürtem rongnungi asayar kati final tongtetogo.
“Ni kanga junga asayaogo ta bilemer. Angie-i kanga junga asayaogo aser lai la den toktepertem point shia atema kanga meranga asayadaktsür,” ta Barty-i ashi.
Barty-i ashiba agi, la Australian Open first round nung Belarus tsür Aryna Sabalenka den asayatsüba atema renemer alitsü.