New Delhi, May 28 (Agencies) : Gas amshir dang nungi süng, kerosene aser nashi scü akong tsüka sorochioker India tsür noklang nung shilem 50 shi dak tenük tashidak temelaba atutsü, ta bushisüngdang ka ajanga ngutetba sülen temetettsü sangdongogo.
Iba bushisüngdang ya All India Institute for Medical Sciences (AIIMS), Aravind Eye Hospitals aser London School of Hygiene & Tropical Medicine tem lokteper agiba lir. Ashiba agi bushisüngdang tulutiba rongnung iba ka lir.
“Temalen shia aliba oset tsüka/amshia sorochiokba ajanga temang nung timtem agütsür anungji India nung nisung ajaki alitettsüsa sorochiokdang amashiba gas temerük aser dalang nündangker,” ta iba bushisüngdang nung lenir aser Aravind Eye Care System nung mendenbuba R.D. Ravindran-i metetdaktsü.
Iba bushisüngdang nung India nung alir yimtaklir aser jila tila nung alir, arishi küm 60 dak tema pur nisung 6,000 shilem agidaktsü.
Bushisüngdang mapang, moko achiba ajak tenük tashidak adokba toktsür gas melena süng aser nashi scü tsüka sorochiokba ajanga tetsür noklang nung shilem 46 dak tema tenük nung timtem adokba ngutetogo.
Item oset amshia sorochiokba ajanga taruba küm 30 tashi nungbo tenük timtem adoker noklang nung shilem 90 akümtsü ta parnoki ashi.
“Iba timtem ya tetsür dak ang putet kechiba süra kidang tetsüri dang sorochioker aser sorochiokba tesem nung mokozü aoba tesem (chimney) mali. Meimlai kerosene amshia sorochiokertem dak iba timtem timba aliba ngutetogo,” ta London School of Hygiene & Tropical Medicine nung professor Astrid Fletcher-i ashi.
Item oset amshia sorochiokba ajanga tenük nung aliba lense sübanga kümdaktsür.
Iba tongutetba ya Environmental Health Perspectives kaket nunga adoktsüogo.
You must be logged in to post a comment Login