Kerosene subsidy & Atal Pension Yojana atema Aadhaar kuli agitsü

New Delhi, June 4 (Agencies): Atal Pension Yojana indang tajangzüktem angutsü aser kerosene alitsü atema sorkar nungi subsidy agitsü atema Aadhaar card nüngdaktsü.
Atal Pension Yojana kübok kerosene subsidy agirtem mesüra pension scheme nungi tajangzük angurtemi, tang nungi Aadhaar number kuli agütsütsüla mesüra Aadhaar atema züluoktsüla, ta Deobarnü ketdangsertemi metetdaktsü.
Kerosene subsidy atema Aadhaar agizüktsü mesüra enrolment asütsü atema tatembang anogoji September 30 asütsü.
Atal Pension Yojana atema Aadhaar agizüktsü tatembang anogoji June 15 asütsü, ta ketdangsertemisa shisem.
Aadhaar card magizük tashi ration card, driving licence, voter identity card, Kisan passbook with photo, Mahatma Gandhi National Rural Employment Guarantee Scheme (MGNREGS) kübok agütsüba job card, gazetted officer mesüra tehsildar kati agütsüba kulikaketji maitsü indang kuli ama amshitsü.
Maneni, iba scheme kübok agütsüba ration card den mesüra bank account den Aadhaar number sendakteptsü atema telemtetba agiogo.
Ministry of Oil and Natural Gas-i Direct Benefit Transfer ka ajanga subsidy agütsür aser ibaji scheme kübok züngsema alir bank account nung indangindanga enoktsür.
Scheme ana nung Aadhaar kuli agitsü lemtetbaji, subsidy tangar keti maotsü aser tangutsü shitak angutsü atema lir. Iba atema Centre sorkari Aadhaar Act, 2016 nung Arrla 7 benokogo.
Iba Arrla nung, sorkari subsidy, benefit mesüra service agütsübaji Consolidated Fund of India (CFI) nungi agütsür aser nisung ka jangjatsü atema mapa inyaktsü akok mesüra Aadhaar indang kuli meshitsü akok, ta lateta lir.
Centre-i state aser Union Territory tem jenjang dalang agi cooking fuel agütsüba ama subsidised kerosene agütsür. Talisa iba teyari ya BPL kübok alir nem agütsür.
Atal Pension Yojana ya arishi küm 18 nungi 40 tashi nem agütsür. Iba scheme kübok züngsema alirtem arishi küm 60 ajungba sülen, peii enokba nung ajemdaker ita nung sen 1,000 nung 5,000 tashi pension agütsütsü.
Tia makai scheme nung züngsema alirji süra, kasa pension ji kinungtsü mesüra kinungbo nem agütsütsü aser ibaji asü nungbo, nominee nem anünga aliba pension ajakji agütsütsü.