Kerry-i Bahrain Foreign Minister, Khalifa den ajuruteper

Manama, April 07 (Agencies): Iran-i par foreign policy mapatong melenshitsü olen ka Bahrain Foreign Minister, Khalid bin Ahmed Al Khalifa-i tanü Brehostibar nü sangoktsüogo.

Par linük semdangsang, US Secretary of State, John Kerry den ajurutepa senden ka amenba sülen osangbener den aroki ajurutepdang Khalifa-i iba olenji metetdaktsü.

“Iran-i par foreign policy melenshitsüla aser tongpang osettsüset shibelenba aser kiralongrartem nem tongpang raratsü terenemshiba agütsübaren anentsüla,” ta pai ashi.

Iran-i Gulf lima nung tensa mejungi kümdaktsütsüsa maparen inyakba atema tebilemtsü khuret benoka Khalifa-i tanü iba olenji sangoktsür lir.

Yaküm 2015 küm September ita nungi tenzüka tanü tashi nung Bahrain tzüyim sepaitemi Iran’er tongpang nung amshitsü osettsüset abenba rong 4 tashi pua ayuba osang bushitetogo aser rongtemi abenba tongpang osettsüsettemji Yemen sorkar anema rarar Houthi telok dangi yokba osanga jangjaogo.

Ano, Iran-i par tongpang nung amshitsü ballistic missile ishika tendanga kadokba sülen par linüki United Nations Security Council (UNSC) telemtetba anema inyaker ta shia, US densema alima linüktemi Iran aija lir.

“Iran-i Yemen tongpang talangba küma atsülangtsütsüsa Houthi telok meyaritsüla aser Syria tongpanga anentsütsü asoshi tongti shilem agitsüla,” ta shia, Iran-i alima tensa tajungba kümdaktsütsü asoshi mapa tajung inyaker ta alima dang sayutsü nungdaka akümba olen ka Kerry-ia metetdaktsü.

Kerry-i tan Bahrain semdangba sülen maneni Japan semdanga Hiroshima nung amentsü ayongba G7 ministerial senden nung shilem agitsü sentong renema lir.