Kerry-i GCC lenirtem den Iran onük benoka senden amener

Qatar kübok Doha nung Gulf Cooperation Council (GCC) foreign minister-tem den senden amendang US Secretary of State, John Kerry (Tiyongtsü)-i Oman Foreign Minister Yusuf bin Alawi (Abelen)-i jembiba o angaba noksa nung angur. (Doha, August 03)

 Doha, August 03 (Agencies): US Secretary of State, John Kerry-i Gulf Cooperation Council (GCC) foreign minister-tem den Iran den nuclear tezüngzüktep agiba aser Middle East nung tensa junga ayutsü den sentakba onük benoka tongti senden ka Doha nung tanü Hombar nü menogo.

“Tongpang nung amshitsü nuclear osettsüset den sentakba timtem agientsüji ozü GCC linüktem indang tongti khuret lir,” ta Qatar Foreign Minister, Khalid Bin Mohammed al Attiyah-i tanü senden nung lemsatep.

“United States (US) nungi teyari agia ozü Middle East nung yimji yimjung lia tensa jungdaktsütsü imlar,” ta pai ashi.

Iran den nuclear tezüngzüktep agiba ajanga Middle East nem timtem bener arutsütsü akok ta khuretsüa bilembaren agientsütsü nükjidong nung Kerry-i GCC lenirtem den tanü ajurutepa senden amenba osang jangjaogo.

Iran anema benokba tenokdangba sentongtem agienba sülen Iran-i bendenba rongsen amshia Hezbollah amala kiralongrar aser telungpur telok balala tang dang nungi tesashi yaritsü akok ta GCC lenirtemi tsüboa bilemba osanga angazükogo.

Ano, Israel-i tashiyim agi agia aliba Palestine lushi nung nübur alitsü ki asütsü tenzükba ajanga Israel aser Palestine na tsüngda tongpang tanaben raratsü tenzüka par Middle East nung tensa mejungi kümdaktsütsü akok ta GCC-i tebilemtsü khuret benoka liasü.

Saudi Arabia-i aniba teloktep Arab mitkartemi par tayimtsü amshia tang amakba maparen kanga sashia inyakdak, Yemen nunga tensa tajungba kümdakja par linük nung yimji yimjung tia bener arutsütsü asoshi GCC lenirtemi tanü senden nung onük benoka jembi.

US Tir, Barack Obama-i taküm May ita senden amenba sülen Kerry-i tanü Saudi Arabia, Bahrain, Kuwait, Qatar, Oman aser United Arab Emirates nungi Foreign Minister-tem den senden amener lir.

Ano külen, Saudi Foreign Minister, Adel al Jubeir den külemi lungjemer tenati Russia Foreign Minister, Sergei Lavrov dena tarutsü mapang senden ka mena tang Syria nung ajurushiba aliba tensa tamajung den sentakba onük benoktsü sentong aliba osang ka Kerry-i tanü metetdaktsüogo.