Kerry-i Israel-Palestine tensa tajungba kümdaktsütsü meranger

Jerusalem, November 24 (Agencies): Israel aser Palestine na tsüngda tensa mejungi akümbaren tajungba kümdaktsütsü nükjidong nung US Secretary of State, John Kerry-i tanü Mongolbar nü Israel semdanga Israel Ato Kilonser, Benjamin Netanyahu den ajurutepba osang jangjaogo.

“Palestine nüburtemi Israel nunger amakba ya kiralongratsüren lir aser kasaji aitsür,” ta ashiba den külemi, Israel aser Palestine na tsüngda tensa tajungba kümdaktsütsü tasa aser lenmangtem bushitsü onük kar Kerry-i tanü Netanyahu den Jerusalem yimti nung senden amendang benok.

“Israel nüburtem anema inyakba kiralongratsü maparen ajunga aitsür. Ano, tai maketba nisungtem tepseta yirutsür ajunga pua parnok nem ozüngi melaba ama tapet temerenshi agütsütsü ajungshir,” ta Kerry-i metetdaktsü.

Ajisüaka, “Israel nüburtem amak tashibo Palestine den yimjung senden mementettsü,” ta Netanyahu-i telangzüba agüja liasü.

Kerry aser Netanyahu nati tanü Jerusalem nung senden amenba jakdanga Palestine nunger kati pai aniba car gari-i Israel mitkar züngsem 3 aser paramilitary border police ketdangser 1 densema, parnok 4 dak tsükokja par 4 prongla yirutsüba osang jangjaogo.

Tesülen, Israel mitkartemi gari anishisangji injang agi kaset aser pa den gari telung nung külemi amensang yiruja liasü.

Ano külen, Kerry-i Netanyahu den ajurutepa senden amenba sülen pai West Bank nung tentetba Ramallah yimti semdanga Palestine Tir, Mahmoud Abbas dena ajurutepa tanü senden amenba osang jangjaogo.

“Israel-i aibelener Palestine sensotem metepseti parnok tepuokdak puoka merenshitsüsa tashi liaka, par mitkar aser police ketdangsertemi Palestine sensotem tepseta tashiyim inyakogo,” ta shia, Abbas aser pai aniba Palestine lenir aikati Israel tashiyim benshiba ken o nung ajemdaker aija lir.

Taoba October ita 1 nü nungi tenzüka Palestine aser Israel na tsüngda tesendaktep taoba mapang ama mejungi akümba osang bushiteta lir.