Kerry-i Kazakhstan lenirtem den ajuruteper

Astana, November 02 (Agencies): Tang Central Asia semdanga senzüsang, US Secretary of State, John Kerry-i Kazakhstan tanü Hombar nü semdanga par lenirtem den ajurutepogo.

US aser Central Asia nung densemba linüktem den rongsenren aser linük kümzüka alitsüren tesendaktep tajung yanglutsü alizüng ayusang, Kerry-i tanü Kazakhstan kübok Astana yimti tonga aoba sülen Kazakhstan Tir, Nursultan Nazarbayev aser Kazakhstan Foreign Minister, Erlan Idrissove na den mapang balala nung ajurutepa senden amenba osang jangjaogo.

“Ozü Kazakhstan nung rongsenren terenlok lidaktsütsü asoshi US-i maneni nungita yaritsü nangzükba atema par lenir, Kerry dang pelar,” ta Tir Nazarbayev-ia metetdaktsü.

Kerry-i yashi, Deobar nüa Uzbekistan linük semdanga tesüiba mapang Soviet Union nung densemba linüktem, Kazakhstan, Kyrgyzstan, Tajikistan, Turkmenistan aser Uzbekistan lenirtem den Samarkand yimti nung ajurutepa senden amenba osang jangjaogo.

Kidangsüa aliba Afghanistan linük nung Taliban telungpur telok tanaben shia arua par linüktem nem timtem agütsütsü aser Islamic State (IS) amala kiralongrar teloktemi nüburtem tashiyim agi par telok nung anioka züngsemdaktsütsü tebilemtsü khuret Central Asia linük lenirtemi tang benoka lir.

Kerry-i Uzbekistan Tir, Islam Karimov dena yashi ajurutepa par sorkari nübur temeten anema inyakba onük benoka liasü.

Taoba Honibar nü Kyrgyzstan linük semdangsang, Kerry-i maneni Tajikistan aser Turkmenistan linük na semdangtsü sentong renema lir.

Russia den tesendaktep mejungi aküm yonga US sorkari Russia den kidangsüa aliba Central Asia linük 5 den maneni tesendaktep tajung ayutsü mulunga aliba mapa agi sayutsü nükjidong nung Kerry-i tan iba semdangtsü sentong ya agir lir.

Ano külen, tan Central Asia linüktem semdanga senzüdang nüburtem tamendakdak ken o kecha makai oda tepuokdak puoka parnok reshikangshiba densema, par sorkartemi nübur temeten anema inyakba anema jembitsü asoshi nübur temeten asoshi nokdakba tongti teloktemi Kerry-i ajungshia lir.

Kerry-ia tan Central Asia linük 5-ji semdangba sülen pai London yimti semdanga Britain Foreign Secretary, Phillip Hammond den tongti senden ka amentsü sentong renema lir.