Amman, February 22 (Agencies): US Secretary of State, John Kerry-i Palestine Tir, Mahmoud Abbas den ajurutepa West Bank aser Jerusalem na nung tongpang raraba ajanga bener arutsüba lendong ajunga agientsü onük benoka jembiba osang jangjaogo.
Taoba ita 6 shi nungi tenzüka, Palestine nungertemi Israel nunger police, mitkar aser nüburtem anema amakba maparen balala inyakba ajanga tanü tashi nung ishiba agi nisung 30 shi tepsetba osang bushiteta lir.
Ajisüaka, police aser mitkartemi Yihuda nunger kotari agi tsüngsettsü mesüra gari agi menüngsetsü meranger Palestine nunger nisung 160 dak tema tepsetba osanga bushitetogo.
“Lendong atalokbaren anentsütsü aser lendong ataloktsüsa osang prokshiba maparen agientsü asoshi ajungshir,” ta Kerry-i lemsatepa liasü.
Ano, Israel-i tashishitsü ken o benokdak, West Bank nung ozüng alema nisung alitsü ki renemba maparen nokdangtsü den sentaktepa, par US-i ‘Two-State Solution’ asangsang nung bener arutsütsü tenangzüka olen ka pai metetdaktsü.
Kerry-i Jordan-a semdanga Syria aser Iraq na nung lendong kanga sashia atalokdaktsüba kiralongrar telok tetsüti, Islamic State (IS) anema raratsüren nung US linük nungitsang, Jordan chuba, King Abdullah II den ajurutepa senden amenba osanga jangjaogo.
You must be logged in to post a comment Login