Kerry-i Saudi lenirtem den Yemen & Syria onük benoker

US Secretary of State, John Kerry (Abelen)-i Saudi Arabia chuba, King Salman den Saudi Arabia anülulentip tsütsü, tzüyimkümlen tentetba Jeddah yimti kübok Royal Court nung ajurutepa senden ka amendang agiba noksa nung angur. (Jeddah, August 25)

Jeddah, August 25 (Agencies): US Secretary of State, John Kerry-i Saudi Arabia chuba, King Salman aser par deputy crown prince Mohammed bin Salman na den Saudi Arabia anülulentip tsütüsü, Jeddah yimti nung senden menogo.
Yemen nung adokba mangatettep ken o bentetja, par linük tongpang rara alir teloktem rong nung yimjung tezüngzüktep agidaktsütsü tasa aser lenmang bushitsü nükjidong nung Kerry-i tan Saudi linük semdanger lir.
Kerry-i yashi, Bodbar nü Nigeria linük toktsüba sülen Jeddah yasüng tonga ao aser Saudi lenirtem den tanü senden amenba den külemi, Gulf Arab nung tentetba linük lenirtem dena senden mena, Syria den sentakba nung par US aser Russia na tsüngda mitkar amalitep alitsü asoshi Russia lenirtem den senden amenba den sentakba osang lemsatepba osang jangjaogo.
Russia Foreign Minister, Sergei Lavrov den Switzerland kübok Geneva yimti nung tan Hokolbar nü senden amenba jakdang par US linük pusema nungitsü ajungmesotsü nükjidong nung Kerry-i Arab lenirtem den ajurutepa senden amener lir.
Kerry aser Lavrov nati Geneva nung ajurutepdang Syria nung tesep tenteta alir Islamic State (IS) kiralongrar telok madak takok ngua raratsüsa par linük ana mitkar tsüngda amalitep alitsü aser IS den sentakba miim osangtsüsang lemsateptsü tezüngzüktep agitsü alizüng yua lir.
Turkey linüki par mitkar aser tongpang nung amshitsü osettsüset par arrtsü adena, Syria-i yoka, idakji tesep tenteta alir IS kiralongrar telok aser Kurd kin nisungtemi tentetba telungpur telok anema tongpang raradaktsütsü tenzükba mapang ka nung Kerry-i tan Saudi linük semdanger lir.