Saudi Foreign Minister, Adel al-Jubeir (Achijilen) aser US Secretary of State, John Kerry nati Gulf Cooperation Council senden nung amenba sülen Saudi Arabia kübok Riyadh nung tentetba King Salman Regional Air Base nung osangbener den aroki ajuruba noksa nung angur. (Riyadh, January 23)
Riyadh, January 23 (Agencies): US aser par linük pusemba Gulf linüktemi Syria nung yimtenren tebentetbaren bener arutsütsü alizüng ayuba olen ka US Secretary of State, John Kerry-i tanü Honibar nü metetdaktsüogo.
Kerry-i tanü Riyadh yimti nung amenba Gulf Cooperation Council (GCC) senden nung Saudi lenirtem den aroki shilem agiba sülen iba olenji metetdaktsü.
“United Nations (UN)-i Switzerland kübok Geneva nung taruba hopta amentsü ayongba mezüngbuba Syria yimjung senden amenba sülen International Syria Support Group (ISSG) telokia Syria nung yimjung lidaktsütsü senden maneni amentsü sentong renema lir,” ta Kerry-i sangoktsü.
“Syria nung yimji yimjung alitsü pungmangji asangsang nung atalokdaktsütsü alizüng yua lir,” ta shia, Kerry-i ISSG telokia Syria den sentakba yimjung senden maneni ayonga amentsü renemba osangji metetdaktsü.
Saudi Arabia, Iran aser US densemba alima tashi abenba linüktemi tentetba ISSG teloki UN nungita Syria nung yimtenren tebentetba bener aruja par linük nung yimji yimjung lidaktsütsü maparen tenzüka lir.
US densema, alima tashi abenba linüktemi Iran anema benokba tenokdangba sentongtem taoba hopta agienba sülen Iran aser US na tsüngda taoba mapang nungi tang tesendaktep tajungba akümba osang bushiteta lir.
Par linük anema benokba tenokdangba sentongtem agienba sülen Iran-i pua ayuba US mitkar züngsem 10 tashi chiokba osanga jangjaogo.
Ajisüaka, “Iran aser US na tsüngda taoba mapang amabo tesendaktep junga meyutettsü akok,” ta Kerry den aroki osangbener den ajurutepdang Saudi Foreign Minister, Adel al-Jubeir-i metetdaktsü.
Kerry-i linük 5 semdangtsü mapatong tanabuba tenzüka tarutsü anogotem nung Laos, Cambodia aser China nunger semdanga North Korea’er nuclear mapatong anentsütsü onük benoktsü sentong renemba osanga angazükogo.
You must be logged in to post a comment Login