Kerry-i Tajikistan & Turkmenistan lenirtem den ajuruteper

Dushanbe, November 03 (Agencies): US Secretary of State, John Kerry-i Tajikistan aser Turkmenistan lenirtem den tanü Mongolbar nü ajurutepogo.

Washington-i kidangsüa aliba Afghanistan linük nung yutsüba US mitkartem anitetadokaka, par US-i Central Asia nung tensa azüoka alitsüren nung maneni tongti shilem agitsü renemba olen ka Kerry-i tanü Central Asia linük lenirtem den lemsatepba osang jangjaogo.

Kidangsüa aliba Afghanistan nungi US mitkartem anitetadokba ajanga Islamic State (IS) densema kiralongrar telok balalai timtem agütsüba den külemi, par nüburtem tashiyim agi par telok rong nung anioksemtsü akok ta Tajikistan aser Turkmenistan naprongla lenirtemi tebilemtsü khuret benoka lir.

Kerry-i Tajikistan Tir, Emomali Rakhmon den Dushanbe yimti nung ajurutep aser Turkmenistan Tir, Kurbanguly Berdymukhamedov dena Ashgabat yimti nung tanü ajurutepa liasü.

“Tajikisatan aser Turkmenistan na densema, Central Asia nung tentetba linüktem kümzüka ayutsü aoshi ozü US sorkari temulungtetba yua lir ta nenshia sangoktsür,” ta Rakhmon den ajurutepba sülen Kerry-i tanü metetdaktsü.

Ano, Central Asia linük sorkartemi sorkar anemer aser kiralongrar anema rarabaren tatemtsü ama bener tai maketba nüburtem tashiyim agi ajemrepa mayutsü tajungshiba olen ka Kerry-i metetdaktsü.

Kerry-i Central Asia semdangtsüren tatembangba anogo nung linük anaji tanü semdanga liasü.

Russia linük den tesendaktep mejungi kümaka, Central Asia nung densemba linüktem den tesendaktep tajung ayutsü alizüng ayuba den külemi, par linüktem kümzüka ayutsüren nung US-i tongti shilem agitsü renemba osang lemsateptsü nükjidong nung Kerry-i tan anogo 5 agia, Central Asia nung densemba linük 5-ji semdanger lir.