Kerry o Lavrov na taruba hopta ajuruteptsü

Paris, July 23 (Agencies): US Secretary of State, John Kerry-i Russia Foreign Minister, Sergei Lavrov den taruba hopta tetenzüklen ajuruteptsü sentong renemba osang angazükogo.
Laos kübok Vientiane nung amentsü ayongba Association of Southeast Asian Nations (ASEAN) nung Kerry aser Lavrov naprongi shilem agitsü renema lir aser tenati ASEAN senden tezülen ajuruteptsü asoshi tan sentong renemer lir.
Küm 5 tejaklen nungi tenzüka, Syria nung mangatettep adoka tongpang raraba anentsütsü nükjidong nung par linük nung yimtenren tebentetbaren bener arutsütsü senden taruba August ita 1 nü amentsü ayonga lir aser iba senden takok ngudaktsütsü onük benoka jembitsü nükjidong nung Kerry o Lavrov nati tan ajuruteptsü sentong renemba osang angazükogo.
“Asia nung amentsü ayongba senden tezülen Lavrov den ajurutepa jurila senden ka amentsü renema lir. Künati ajurutepdang Syria nung adokba mangatettepbaren bentettsütsü tasa aser lenmangtem den sentakba onüm benoktsü,” ta Kerry-ia metetdaktsü.
Lenir anati tsüngdong ajurutepdang parnoki aroki lungjemer Islamic State (IS) aser al-Nusra Front kiralongrartem madak takok angutsü lenmang aser tasa bushitsü sentonga renema lir.
Ano külen, Syria nung tesep tentetba IS telok anema amaktsü miim osangtsüsang par linük ana tsüngda lemsateptsü onük ka US sorkari Russia den benokba osanga angazükogo.