Kerry o Lavrov nati rongdak senden ka amener

New York, October 01 (Agencies): Syria nung tenzüka aliba Russia aser United States mitkartem na tsüngda tongpang raratsü tsüboa US Secretary of State, John Kerry aser Russia Foreign Minister, Sergei Lavrov nati rongdak senden ka yashi Bodbar nü menogo.

Russia-i par mitkar züngsem aser tongpang nung amshitsü osettsüset Syria-i tsüngdong yokba den külemi, par mitkar tayimtsütem amshia Syria nung amakba maparen tenzükba sülen Kerry o Lavrov nati tang New York nung temendak United Nations (UN) senden tezülen ajurutepa liasü.

“Russia mitkartemi par tayimtsü amshia Syria nung amakba maparen inyakba osang jangjaogo. Ajisüaka, parnoki tang Syria aser Iraq na nung lendong kanga sashia atalokdaktsüba Islamic State (IS) kiralongrartem anema masü saka Syria Tir, Bashar al-Assad-i aniba sorkar anemertem amakba osang bushitetogo,” ta tongti US ketdangsertemi metetdaktsü.

Parnokisa ashiba agi, Russia mitkartemi IS telok amaktsü tatemsü bener Syria sorkar anemertem tepsettem ang amak aser amaktsü osangjia amakba maparen inyaktsü ghonda ka tejaklen ang par US-i aniba alima teloktep mitkarem dang metetdaktsü.

Aji oda, Kerry o Lavrov nati yashi ajurutepdang par mitkartem rong nung merarateptsü aser Syria nung yimji yimjung tia lidaktsütsü asoshi yimtenren tebentetbaren bener arutsütsü onük benoka jembiba osang jangjaogo.

“Ozü mitkartem tsüngda tongpang meraratsü aser Syria indang tensa tajungba kümdaktsütsü onük Lavrov künati benoka jembiogo,” ta Kerry-ia metetdaktsü.

“Syria nung yimtenren tebentetbaren bener arutsütsü onükji ozü lenir ana, Tir Vladimir Putin aser Tir Barack Obama na den lemsateptsü renemogo,” ta Lavrov-ia osang jangjashitsü.

Ano külen, “Russia mitkartemi par tayimtsü amshia amakba maparen inyakba tesemtem nung IS telok atsüka maliba osang bushitetogo. Küm 4 tejaklen nungi tenzüka tongpang kanga sashia raradak, Syria nung Russia-i teka amoktsü tenzükba ajanga Syria’er mangatettep ken o taoba mapang nungi tamajungba kümdaktsütsü ana nung dang lir,” ta US Defense Secretary, Ash Carter-ia metetdaktsüogo.