Kesonyu Yhome-i GHSS, Dimapur nung Biotech laboratory lapoktsü

Dimapur, April 29 (TYO) : Meimchir tenzüktsü atema mamshira academic degree tem anguba aser shisaluyimbaji amajok dang lir, ta Dimapur Deputy commissioner, Kesonyu Yhome-i metetdaktsü.
“Shisaliok indang nükjidongji asen loktiliba nem meyipa agütsütsüba lir aser nisung kati lokti nem meyipa agütsütsü indang tangatetba maru tashi pai shisaluyimba nung jenjang aika tongtetbaji nüngdak mali” ta tanü Kesonyu Yhome-i ashi.
Hokolbarnü GHSS Dimapur nung Biotech laboratory lapoktsüba sentong nung Dimapur DC-i iba onük jembi.
“Meimchir tejakleni aotsü aser renloktsü atema Science ji tongtiret ama lir, anungji Science azüngertemi metetnüba tanela alitsüla aser langka tasen ka bushitettsü atema tejangraba aser tangatetba alitsüla,” ta paisa kaketshirtem ayongzük.
Sentong nung Assistant director, School Education Department, Limatangit-i o jembidang, Nagaland nung biotechnology ji kanga teputep lir kechiyong asen state nung süngdonglidong aser shiruru aika lir, ta ashi.
Sentong nungsa Department of Plant Pathology, SASRD, Medziphema nungi Prof. L Daiho-i power-point presentation ka ajanga biotechnology indang sayu.
Iba sentong nung GHSS Dimapur principal, B Watisenla Aier-i tesentepertem ajak pela agizük aser Peace Channel, GHSS Dimapur-i ken ka aten.