Ketdangsertem, Directorate nem tesayur melemzüktsütsüla: ANCSU

Kohima, Monupii/May 03 (TYO): Department tamajungtem rongnung Directorate of School Education densema lir aser parnoki kanga tongtibang ketdangsertem, Directorate, DEOs aser SDEOs nem tesayurtem lemzüktsüba ajanga kaketshirtem takoksa angur, ta All Nagaland College Students’ Union (ANCSU) Social & Cultural Secy., Keneitsituo Kense aser Asst. General Secy., Imnameren N Jamir nati sangdong ka nung metetdaktsü.
“School Education-i yimya balala ajanga kakeshirtem jenjang aser sorkar school jenjang raksaja asen loktiliba kanga raksatsüogo,” ta ANSCU-i metetdaktsü.
“ANCSU-i ayongayonga mener ola madoktsü, saka anogo taruba 30 nü tsüngda mapa lemzükja aliba tesayurtem (attach teachers) magienra onoki tashi amshia department shibangtsütsü, iba denji külemi ANSCU takhangba anema inyaker mapa lemzükja aliba tesayurtem aser ketdangsertem danga tekümdangtsü metetdaktsür,” ta sangdong nung shia lir.
Ano külen ANCSU-i college tem nung VIP sobaliba nokdanga, sorkar garitem aser sorkar ketdangsertem nem lemzüktsüba garitem tim mesüi amshia, kaketshirtem college-i meinoktsüba mesüra college-i tanii aoba ANSCU-i khenyongi nokdanger, iba denji külemi gari lemzükja aliba sorkar ketdangser tsüraburtem aser kaketshirtem danga tuyuba ama inyaktsü metetdaktsür, ta ANSCU-isa metetdaktsüogo.
Iba dak sendakba nung ANCSU-i parnok kübok unit/union ajak dang Union-i tuyuba ama tashi mangara item ama sorkar ketdangsertem indang gariji pua yur kasa osangji ANCSU ketdangpurtem nem metetdakjang, ta tuyuogo.