Ketdangsertemi nüburtem taliba nendaka tenzüktsüla: Angh

Chozuba nung Nagaland Angh, PB Acharya den Phek Deputy Commissioner, Muroho Chotso, Chozuba Sub Division Administration aser tanga ketdangsertem külemi agiba noksa ka angur.

Chozuba, April 26 (TYO): April 25, 2017 nü Nagaland aser Arunachal Pradesh Angh, P B Acharya-i Ruzaho semdangba mapang Phek Deputy Commissioner, Muroho Chotso, Chozuba Sub Division Administration aser tanga ketdangsertem ajurua shisa lemsatepa liasü.
Angh-i sub division nung ketdangsertem dang iba tesem nung nüburtem ano taliba nendaka tenzüktsü ajungshia liasü.
Nüburtemi nenok dang nungi imlar, anungji parnok temetentem sendoka meyutsütsüla, ta shia Angh-i , “Tasü ittang aser nüburtem atema inyakang,” ta ashi.
Shisaliok tsütsü tebilemtsü kaja Angh-i, SDEO-i pa kübok aliba tesem nung temelen inyakdaktsüba (proxy) tesayurtem mita reprangtsüla, ta ashi.
Acharya-isa, “Nija school tesayurtem dang nungibo sorkar school tesayurtem nem itasen timba agütsür, iba den külemi parnokji tatidang agia shimbatem lir, ajisüaka sorkar school tem tatidang osang agi temulung masür, iba nung ya temelenshi nüngdaker,” ta metetdaktsü.
“Lokti ka terenlok atema tamendakdakji shisaliok lir, anungji nükjidong tajung yur department-i inyaktsüla,” ta paisa ashi.
Angh-isa, “Higher Seconday nung admission bushir kaketshirtem tali süra school tem nung class ajungkettsü atema ketdangseri takhangba agüja inyaktsüla. Higher Secondary shisaliok atema kaketshirtemji Kohima, Dimapur mesüra tanga jilatem tashi mesenzüdaktsütsüla,” ta ashi.
Gari lenmang tajung nüngdaker, ta shia Angh-i PWD dept. dang sub division den sendaktepba lenmangtem tajungba küma yanglutsüla, kechiyong terenlok atema lenmang tajung nüngdak, ta ashi.
Gari lenmang tajung aliba ajanga iba sub division nung tourism ajungkettsütsü, ta shia Acharya-i, “Kodang Ruzazho village ya Heritage Village ta sangdongdir raliwalirtem timba akümtsü,” ta metetdaktsü.
Angh-isa Chozuba Range Public Organisation nungi züngsemtema ajurua liasü aser iba mapang nung parnoki pa nem Chozuba nung college ka amenoktsü atema temepishiba shidi ka agütsü.
Ajioda Angh-ia ibaji Minister in charge nem agütsütsü, ta shiogo.