Ketdangsertemi scholarship sen tim mesüi amshi: ANCSU

Dimapur, Rongjui (September) 22 (TYO): Comptroller and Auditor General (CAG)-i March 31, 2017 tashi atema Nagaland state indang report agütsüba nung scholarship sen tim mesüi amshiba atema All Nagaland College Students’ Union (ANCSU)-i Directorate Technical Education nung Director dangi shidi ka zülu.
Directorate of Technical Education-i scholarship sen tim mesüi amshiba CAG report nung lir. Department-i sen crora aika indang scholarship funds mashilen amshibaji kaketshirtem mezüngmeshiba inyakyim ka lir, ta ANCSU-i shidi nung shia lir.
“Kodaser directorate of technical education-i kaketshirtem indang scholarship sen ajanga mapa nungi anenba atema benjungtem ayongzüka amung, department nüngdaktem lijaliyong aser mapa inyaker nem itasen agütsü?” ta ANCSU-isa asüngdang.
Ketdangsertemi yamai inyaksangshiba osang angashidang ANCSU kanga aoksar aser Directorate of Technical Education ya kaketshirtem yaritsü atema asü mesüra anema noktaktsü atema ta süngmanger, ta Tatong Tir Benjong Longchar aser Tongti Tezülur Vimeyiekho Vitso nati shidi nung shia lir.
Department nung scholarship sen tim mesüi amshiba ketdangsertem mapa nungi anentsütsü akhanger kechiyong parnokji kaketshirtem atema lendong lir. Maneni, Directorate of Technical Education-i anogo pungu tsüngda scholarship sen tim mesüi amshiba aser tangalen belenzüka amshiba osang tejangja ANCSU ket nung agütsütsü takhangba agütsür. Iba onük atema tatemtsü mesüra tanga onük kecha magizüktsü aser department-i osang magütsüra ANCSU-i mapa inyaktsüsa akümtsü, ta mendenpurtemisa shidi nung metetdaktsü.