Ketdangsertemji terenlok tongshitem lir: Angh

Kohima, April 20 (TYO): National Civil Servants Day anogomung nung sorkar ketdangsertem nem tenüngsang agütsüdang Nagaland aser Arunachal Pradesh Angh, P.B. Acharya-i sorkar ketdangsertemji peipei tentet aser deparments nung temelenshi adokdaktsür kaka asütsüla, ta metetdaktsü.
Angh-i, nüburtem tenzüktsü atema sorkar ketdangsertem asüngsashitsü aser pei mapa mejetmejeta inyaktsü asoshi kümshia April 21 nü “Civil Services Day” amungtsü atema India sorkari telemtetba agiogo, ta metetdaktsü.
Terenlok atema ketdangsüba maparen nung mapa kanga junga inyaktsü asoshi mapang tongogo, ta paisa ashi.
Paisa sorkar ketdangsertem dang, “Nenok ya mapa inyaker ka dang masü saka nüburtem tenzükba mapa nung nija aser telok sasep nung longjemer inyakertem lir. Nüburtemi parnok tebilemtsü onüktem atema ketdangsertem dak rangloker,” ta ashi.
Angh-isa, ketdangsertemji terenlok atema tongshitem lir aser sorkar indang tongtiret lir, ta ashiba den külemi nübur tsüngda mebendangi pei mapa nendaka inyaktsü ayongzük.
Acharya-isa, ketdangsertemi linük temzüng nung aliba ama inyaktsüla, ta ashi.