Kevijau colony nung DMC-i yangluba lenmang lapokogo

Dimapur, March 24 (TYO): Tanü Urban Development Advisor, S I Jamir-i Kevijau colony nung Dimapur Municipal Council (DMC)-i 14buba (metre 515) lenmang yanglushiba lapoktsüogo.
Dimapur Municipal Council (DMC)-i tesüiba ita 15 nung Dimapur aser temeket nung project 100 dak tema inyakogo. DMC-i Dimapur nung aliba kiyong balala nung box concrete culvert, dustbin, kilentzü aoba aser lenmangtem yangluogo.
Kevijau colony nung alirtemi sen lakh 3 saruteta DMC nem agüja Livingstone Foundation Higher Secondary School leni aoba tanüngba lenmanga yanglujang ta mepishiogo.
Iba lenmang lapoktsüdang S I Jamir-i, terenlok atema colony sangertemi DMC nem tenla agütsüba atema tenüngsang agütsü.
“Nüngdak ajak atema sorkar dak dang imlaba ajanga tebilemtsütem mokoktettsü, terenlok atema tenla agütsüba aser bendanga agütsüba tanela alitsüla,” ta paisa ashi.
SI Jamir-isa, Kevijau kiyongertemi tenla tajung agütsüba ajanga tanartem dang tatishitsü tajung sayutsü, ta ashi.
Dimapur nung DMC, CEO kübok terenlok mapa aika inyakba atema SI Jamir-i DMC, CEO Atokhe Aye nema tenüngsang agütsü.
DMC, CEO Atokhe Aye-ia, Livingstone school tsütsüleni aoba lenmang merenemi alibaji tekaraba nung yanglutsütsü ta ashi.
Iba sentong ya Kevijau colony chairman, E. M. Tia Jamir leniba nung agi aser secretary, Er. Nizal Tepa-i anküp tepela o jembia liasü.