KG Kenye-i Naga yimten asoshi akanga nokdaktsü ayongzük

Kohima, Oct 12 (TYO) : Nagaland nungi yokba Rajya Sabha nung tatar, Wb.K G Kenye-i tanü Bodbar nü Naga People’s Front (NPF) telok dang Naga yimten tebilemtsü koktettsü asoshi yaritsü nangzükba ama akanga nokdaktsüla ta metetdaktsü.
Pai iba o ya tanü Phek district kübok Chizami Constituency nung NPF office lapoktsüba mapang metetdaktsü. Pa ya NPF nung tongti zülur lir. Naga nunger temeten aser ayak yabo kodang bendanger küboki aitsü makok, anungji Naga yimten temeten bushiba mapa nung takok angutsüla ta paisa ashi.
Nagaland kümer tensa mapang aiben melenshia aruaka 1963 küm Democratic Party tenzüka aruba nungi tanü NPF tenüng melena aruba tashi nung kasa temzüng, nükjidong aser noksa amshia arur aser NPF teloki Naga yimten tebilemtsü koktettsüsa inyaktsü temulungtetba aser tenangzükba tulu nung nokdaka lir ta paisa ashi.
Naga nunger yimten nüchiso asoshi raraba indang ashidang, nübortem nem tangatetba junga magütsüba agi temulung melemtep tali adoker, ajisüaka asenoki tashiyim agi masü saka tangatetba agi kodang shisalemsatepdir, idangji asenoki tang ajuruba tebilemtsü ya koktettsü ta paisa ashi.
Kenye ya 17th Chizami A/C nungi lir aser joko taruba election agitsü ita 18 dang anünga lir asünungji NPF nung adener tetsür tebur aser lanur tain ajaki meranga inyaktsüla ta paisa ajungshi.
Iba constituency nungi adoksang, Higher & Technical Education nung Parliamentary Secretary, Deo Nukhu-ia jembidang, party nung metaloker aliba government ya party nung inyakertem dak keta lir, anungji nübortemi aginütsüsa meranga inyaktsüla ta ayongzük.