KGF film Pakistan nung sayatsü renema lir

Aenjeti/January 14, 2019 (Agencies): Indian Box Office nung kanga takok ngua sayaba sülen Yash-i tongti shilem agiba Kolar Gold Fields (KGF) film ya Kannada film rongnung Pakistan nung mezüngbuba sayatsü aliba film kümogo. Osang ajanga ashiba agi, iba film ya Pakistan nung theater tem nung February 11 nü sayatsü.
“Parnoki iba film Hindi agi mangaoker Lahore aser Islamabad nung multiplexes tem nung sayadar aser nüburtemi kanga sapua reprangdar. Distributor temi box office nung sen aazükba melemsatepaka onoki iba film ya junga sayudar ta angateter,” ta film asadanger aser Bangalore Film Festival ayonger Harish Mallya-i ashi.
Iba film masüdang Pakistan nung Rajnikanth indang 2.0 film takok ngua sayuogo. “Nüburtemi iba film ajungba tenüngsang aika agütsüogo aser kasaji linük ajunga nung tejangraba aliba nguogo. Kannada film rongnung iba film ya mezüngbuba Pakistan nung sayatsü lir,” ta Mallya-isa ashi.
Iba action film ajanga Kannada cinema atema box office nung otsü tasen yangludar. Yash-i tongti shilema giba film koba December 21 nü Tamil, Telugu, Malayalam aser Hindi nung sayaa liasü, iba film ya meneni India aser bendanglen kanga takok ngua sayadar. Shishilembaba osang ajanga ashiba agi, iba film sayar anogo 18buba tembangba tashi nung film yagi sen crore 200 dak tema aazükogo.
KGF film ya Prashanth Neel-i direct asü aser iba film ya shilem ana küma lemsar lir. Mezüngbuba shilem nung Yash ya Mumbai aser Kolar Gold Fields nung gangster ka ama intetba sayur aser tanabuba shilem nung pa atemzüka aluba dak tali rangloker yanglutsü.