KHADC CEM tasen shimogo

Shillong, March 24 (Agencies): Meghalaya nung Sohra constituency nungi Khasi Hills Autonomous District Council (KHADC) züngsem Titosstarwell Chyne-i Chief Executive Member (CEM) inyaktsü.
Mongulbarnü pa den tetokteper shinga melii iba mapa atema shimogo.
CEM Latiplang Kharkongor-i aniba Executive Committee (EC)-i ‘no-confidence motion’ nung tamakok anguba sülen Chyne CEM inyaktsü shim.
Sohryngkham Constituency züngsem Pynïaid Sing Syiem-i ‘no-confidence motion’ benok aser United Democratic Alliance (UDA) züngsemtemi ibaji pusema nungit.
UDA-i ashiba agi council nung executive committee tashitait ka nüngdaker, kechiyong taoba ita pezü tashi council tashimeiti arur.
Iba jagi February 7 nü Governor’s Rule alitsü benoka liasü, ta parnokisa ashi.
Governor’s Rule ji March 21 nü agien aser March 24 nü KHADC indang special session ka nung ‘no-confidence motion’ agitsü anogo lateta ayu.
COVID-19 prokshiba azüoktsü atema Meghalaya ajungalen shibangba mapang ka nung special session ayonga agiogo.