Khandu-i Arunachal CM inyaktsü tenangzükba agi

Itanagar, July 17 (Agencies) : Honibarnü Arunachal Pradesh assembly nung Congress lennir asütsü shimba Pema Khandu tanü Chief Minister inyaktsü tenangzükba agiogo.
Arishi küm 37 tain Pema ya linük nung chief minister tanubosang asütsü. Yashi taoba chief minister Nabam Tuki-i Congress Legislature Party lennir menden toktsü aser ibaji pai melenzük.
Arunachal nung Tuki lenisüba anema noktakba Congress MLA 30 rongnung Pema Khnadu dena liasü.
Tanü Congress züngsem Chowna Mein-i deputy chief minister atema tenangzükba agi aser pai osangbener dang ashiba agi, “Pema Khandu ji arishi küm tanur saka pa ya kanga shisataka nisung ka lir. Anungji, onok indang sorkarji tashitait asütsü.”
Deobarnü state yimtiba Itanagar nung Congress MLA ajak senden ka nung aden aser iba sülen Pema-i Angh dang pa pusema nungitba MLA tem tenüngtem züluba shidi ka bener oa agütsü.
Congress nungi MLA 45 prongla külemi longjemba ajanga züngsem 60 agi akümba Arunachal Pradesh Assembly nung parnok nübo kanga agi teimba kümogo.
Itanagar nung Delhi nungi Congress lennir shinga arua mali saka osang kar ajanga ashiba agi Congress vice-president Rahul Gandhi’er office ajanga Congress nung temulung masürtem meyipa telok dangi anir aru.
Tanü Chief Minister inyaktsü tenangzükba agiba sülen Pema Khandu-i tebu asür Dorjee Khandu, Nabam Tuki aser Kalikho Pul nungertemi tenzüka aliba mapatong tongtipangtem ajak tembanga inyaktsü ta metetdaktsü.
“Taoba küm pezü tsüngda Arunachal Pradesh sorkartemi tenzüka aliba mapatongtem tekaratiba nung tembanga inyaktsü aser tourism, hydropower, agriculture & horticulture, health education aser communication mapatem jenjang ajungkettsü” ta Pema-i osangbener den sensaksemdang ashi.
State kechisarena ajaklen renlokdaktsütsü atema party telemsa kecha melii pai ‘Team Arunachal’ tangatetba nung inyaka aotsü. State nung MLA ajak terenlok atema inyakba maparen nung shilem agidaktsütsü, paisa shisem.
China den arrtsüa aliba Tawang district kübok Mukto assembly constituency nungi Pema-i anaben tashi election nung tetokteper melii takok angu aser pai arrtsülen alirtem tanga tesemi belena aoba inyakyim anendaktsütsü atema Centre nungi teyari agia Border Area Development Programme (BADP) kübok mapa inyaktsü ta ashi.