Khandu-i timtem nung alirtem nem teyari agütsütsü tetuyuba agütsü

Itanagar, May 16 (Agencies): Dirang tesem nung tzümetsüng aruba, Lekang nung yipru tesashi adokba aser Kerang tesem nung mi lendong ajuruba purtem atema aria bilemtsüa Chief Minister Pema Khandu-i item tesem district ketdangsertemi oset teraksaba tem indang osang tejangja magütsü tsüngda teyari agütsüa alitsü asoshi tetuyuba agütsüogo.
Secretary Disaster Management Jokey Angu item lendong nung teraksa tulu ajuruba indang osang agütsü. Pai ashiba agi, Lekang circle kübok New Mohong yimtsüng nung nisung ka asüba osang angazükogo aser kasa mapang nung Lekang aser Namsai circles nung Hombar nikongtsütsü yipru tesashi ajanga nisung telidak ki aika kanga mejungi raksatsüogo.
Ano tanga lendong ka nung Dirang administrative headquarter nung tzümetsüng arua teraksa aika adokdaktsü. Tang tashi nung nisung asüba osangbo kecha mali, saka tzümetsüng ajanga iba tesem kanga mejungi raksatsüogo.
Maneni tawa Kerang yimtsüng nung mi lendong tesashi ka adoka ki 30 tashi rongtokogo. Chief Minister-i item tesemtem nung ki ojen süshiba aser tenüngdakba balala peridaktsütsü asoshi sen teyari agütsütsü atema tetuyuba agütsüogo. Pai ano district ketdangsertem dang takoksa aluba jenjang tekeraba nung asadanger metetdaktsütsü asoshi tetuyuba agütsü. Pai maneni nüburtem dang iba amala lendong nungi jenbuatsü asoshi kümdanga alitsü ajungshi.