Khandu, Rijju nati PMUY Arunachal nung amenoktsü

Itanagar, June 11 (Agencies): Tanü State Banquet hall nung sentong ka nung Chief Minister Pema Khandu, Minister of State for Home Affairs Kiren Rijiju aser state Food and Civil Supplies Minister Kamlung Mossang nungeri külemi Arunachal Pradesh Pradhan Mantri Ujjwala Yojana (PMUY) amenokogo.
PMUY anemokba anogo nungtem nung nisung 24 nem LPG connection agütsü. PMUY amenoker küm ka tsüngda linük ajunga nung LPG connection crore 2.2 süogo.
Iba sentong tajung amenokba atema Ato Kilonser Narendra Modi tenüng asangba den külemi Khandu-i ashiba agi, iba sentong ajanga Arunachal kanga ajangzüktsü kechiyong state nung nütsüng yongsük tesadangaka, talisa yimtsüng nung alirtem tang tashi sorochioktsü atema süng amshi aser iba ajanga aremtem raksatsür.
June 2 nü Khandu aser Rijiju nati New Delhi nung Union MoS, Petroleum and Natural Gas, Dharmendra Pradhan den ajurutepba mapang minister-i 2019 tashi nungbo Arunachal nung kibong shia nung LPG connect sütsütsü ta nangzük. Pai tena dang state nung iba schem tekaraba nung amenoktsü asoshi ajungshi.
PMUY kübok tetsürtem Below Poverty Line (BPL) kibong nung alirtem nem sorochioktsü asoshi totzü temerek agütsütsü. Iba schem ajanga linük ajunga nung BPL nung alir kibong crore 5 nem LPG connection agütsütsü asoshi nükjidong lir aser maneni connection ka atema sen 1600 agütsütsü.
Iba dak sendaka Khandu-i state sorkaria scheme nung sen agütsüba den bendenloka sen 1000 agütsütsü ta sangdong. Iba ajanga state nung nüburtem nem connection ka atema sen 2600 teyari agütsütsü aser iba nung security deposit, pressure regulator, safety hose, consumer card aser installation charges densema lir.
Chief Minister-i maneni Union Ministry of Petroleum and Natural Gas kübok Oil Industry nung züngsemtemi linük nung iba mapa tajung inyakba atema parnok tenüng asang.
North East tesem nungi tepokpok cancer timba adokba dak sendakba nung Rijiju-i, iba ya kibong ajak amai nung sorochiokdang süng amshiba ajanga lir ta metetdaktsü. Pai ashiba agi, PMUY ajanga iba ya melenshitsütsü aser iba ajanga maneni tzü mepong mereka kümdaktsüba dang masü saka arema wazüka yutettsü.
Oil industry records ajanga sayuba agi, 2017 May ita 1 nü tashi nung Arunachal nung kibong 3.14 nung LPG amshir koba shilem 64 lir. Tarutsü nung LPG amshir noklang nung noklang shilem tongtettsü asoshi Oil Marketing Company temi ‘Mela’ aser ‘Camp’ tem tesem balala nung ayongzüka BPL nung aliba kibongtem nem LPG agütsütsü. Iba dak alaka LPG distributor tasen 7 amenoktsü asoshi sentong lir.