Khar Gazetted Officers’ Union küm 25 jungogo

Khar Gazetted Officers’ Union (KGOU) küm 25 Jubileemung nung togti o jembir Asangba Chuba Ao, IAS (abelen)-i o jembiba aser DAN & NBRM Chairman, Dr Longrineken, MLA-i Silver Jubilee nüngo sayatsüdang agiba noksa angur.

Dimapur, November 27 (TYO) : Honibarnü Khar Gazetted Officers’ Union (KGOU) pur Dimapur nung küm 26 ajungba jubilee takok ngua mungogo.
Iba sentong ya KGOU Tir, K. Mendang Jamir’er (Senior Accounts Officers, Treasuries and Accounts) kidang ayongzüka agi aser Central & State Government, PSU’s, Retired Officers aser tejaokertem aden.
Sentong nung tongti O jembirji Commissioner, Taxes, Asangba Chuba Ao, IAS liasü aser pai onük jembidang, KGOU züngsemtem dang parnoki tenzükba nübortemi akhümtsübutsüsa alitsü aser pei lemzükba mapa takok ngua inyaktsü atema tayongzükba agütsü.
Paisa, ketdangsertem dang tenendak asütsü, mapa meranga inyaktsü, yimya-tsüya tajung benshitsü aser nübortem nüngdakba peritsütsü atema inyaktsü tayongzükba agütsü.
Public tenzükba ketdangsertem, talisa lanurtemi mezüng nübortem südaktsütsü aser aibelena inyaksemdang tebilemtsü khuret abentsüla, ta Asangba Chuba-isa ashi.
Sentong nung Taliremba, IDAS, OSD Finance Department, Kohima, aser Imkongneken, Additional Director, Soil & Water Conservation nati o tatsütsü jembi.
KGOU tenzükertem rongnung ka aser taoba Geology & Mining Director, Er. S.H Walling-i küm 25 tejakdang iba telok tenzükba indang osang metetdaktsü.
Sentong nung DAN & NBRM Chairman, Dr Longrineken, MLA-i Silver Jubilee nüngo sayatsü aser pai ketdangsertem dang yimtsüng nung terenlok bener arutsü atema mapa talila inyaktsü ayongzük.
Dr. Longrineken-isa ketdangsertem dang tali bendanga agütsüshitsür nübor tenzükba mapa inyaktsü ayongzük.
Jubilee sentong magidang, KGOU lokti senden ka amen aser iba mapang ketdangpur tasentem den züngsem pungu agi akümba Executive Committee ka shim.
KGOU ketdangpurtem:
President : Watichuchang,
Dy Commandant,1st NAP, Chumukedima,
General Secretary : Nungshilemba,
Asst General Manager NST
Treasurer : Er. I. Tiameren Walling, E.E,PWD,
Finance Secretary : Merenlemba Walling, Food Inspector, H&FW