Khar Yunen-Yimak Jupang kosasanger putu tasen agizükba sentong

Dimapur, May 2 (TYO):  Khar Yimdak Yunem Yimak Jupang (Kosasanger Putu) Yimsüsüba menden tasen agizüker, Tsüngrem temoatsü meshiba aser yimsüsüa aotsü atema shisadokden sentong ka Khar Yimdak April 29-30, 2016 nung ayongzüka mongogo.
Iba sentong ya Wb. Kikalemba Jamir-i ketdang süa agi aser KBA sannüker, Wb. Lanukümzük Walling-i temoatsü meshia sarasadema tenzük
Sentong nung Wb. Dr. Longri, MLA Chairman, DAN & NBRM, Nagaland, Wb. Temjenwati Walling, SDE, BSNL Dimapur, Wb. C.T. Jamir, Senior Advocate, Guwahati Highcourt, Kohima Bench, Wt. Alila Wai, President Dimapur Watsü Telongjem, Wb. I Kika Jamir G.B Khar, parnoki nükla tuluba nung rangloker telongjem aser teyaritep agi ochi nung yimsü asütsüba tayongzükba agutsüba den külemi yimsü süa aodang yimtsüng terenlok atema inyakyim balala koda inyaka aotsü item lemangtem tesayuba agüja shisalemsatepa liasü.
Iba sentong nung jupangtsür/züngatsürtemi sobaliba ken tenlokja shilem agi. Rev. Dr. Wati Jamir ajanga Tsüngrem o nungi tayongzükba agüja sarasadem ayongzük, aser Wb. Imdongangba, Council Chairman Khar, ajanga melepzüng o jembia senden tembang.
Jupangsangeri Putu Yimsüsüba menden tasen agizükba tenüng nung ajaki arok yimsüsür khuret abener ta asüba temaitsü sobaliba inyakyim nung amendaker putu shilen shi jarong tur jupangsanger züngsem ajak lemsatepa liasü, ta Yunem-Yimak Jupang mendenpurtemi sangdong ka nung metetdaktsü.