Khashoggi tepsetba ‘Documentary yanglutsü asoshi Sean Penn Turkey nung oa lir

Luchii/December 6, 2018 (Agencies): US actor aser film yanglur Sean Penn den par telok Rasemnü/Wed. Istanbul, Saudi consulate kima nguogo, aser osang ajanga ashiba agi, Jamal Khashoggi tepsetba dak sendakba nung documentary ka yanglutsü asoshi sentong lir.
Turkish private NTV broadcaster-i ashiba agi, Pa Khashoggi tepsetba dak sendakba nung documentary ka yanglutsü atema osang tejangja bendentsü asoshi aru. Khashoggi ya mezüngbo Saudi Crown Prince Mohammad bin Salman pusemer ka liasü saka mapang tatsüka lir pa anemer ka aküm aser pa tepsetba ajanga alima ajunga arakzüdaktsüogo.
Oscar award anaben tashi ngur alisang actor aser pa den külemi mapa inyakertem consulate kima aser Saudi consul ki telung nung tangokba nguogo, shiba Mongputeni/Oct 2 nü osangbener ka tepsetba sülen Turkey toktsür ao.
Khashoggi, ya Washington Post columnist ka liasü aser pa Turkey tsür Hatice Cengiz den kibong akümtsü asoshi kuli kaket kar tabeni consulate telungi aiba sülen sama.
Mezüngbo pa consulate nungi taküm ao ta ashiba sülen hopta ka lir Saudi administration-i pa “rogue” team kati tepset ta nangzüka liasü.
Kasa osang ajanga ashiba agi, Penn yimti nung Cengiz den ajuruteptsü imlaa liasü.
Sabah daily sangdong ka ajanga ashiba agi, actor-i Turkey nunger ketdangsertem den ajuruteptsü asoshi Ankara semdangtsü.
Istanbul prosecutor-i ashiba agi, Khashoggi ya Saudi consulate telung nung aletset aser pa tasümang alangsar tindokmong maket samatsü.
Turkey police aser nisung tepsetba tesem bushisüngdangertemi Istanbul aser kidanger Yalova province nung pa temang maneni bushidar.