Khekaho-i district IPR ketdangsertem nem ‘Audio-Visual’ osettem lemtsü

May 12, 2016 nü IPR Directorate , Kohima nung Parliamentary Secretary, IPR, Khekaho Assumi, Secretary, IPR T. Ao, Director IPR Pausui Zeliang aser IPR ketdangsertemi  District IPR ketdangsertem nem nüngdakba osettem agütsüba sentong agiba noksa nung angur. 

Kohima, May 12 (TYO) : May 12, 2016 nü IPR Directorate, Kohima nung Parliamentary Secretary for Information & Public Relations, Khekaho Assumi-i, district IPR ketdangsertem nem nüburtem dang osang tsüsang metetdaktsü dang amshiba oset, generator kar, still camera kar aser Desk Top Computer kar dena ‘Audio-Visual’ osettem lemtsü.
Item oset agütsüba sentong tatsüka agiba mapang Khekaho-i, “State nung department dang nangzükba ama mapa küma inyakba ajanga ni o dang masü saka mapa inyakteta sayuba yimsüsür ka ta sayur,” ta ashi.
Pai, IPR department dang directorate aser district ketdangsertem na tsüngda tongtepratepa aser tesentaktep akhanga alitsü nüngdak ta ashidang, district ketdangsertem dang parnoki inyakba metetdakja inyakyim nung terenlok achitettsüsa meranga inyaktsüla, ta ajungshi.
Ano Dimapur nung Multi Media Hall ka asütsü atema project den tanga project-a kar tekaraba nung mapa akümtsü imlar, ta paisa ashi.
Sentong nung Secretary IPR, T. Ao (IAS) aser Director IPR, Pausui Zeliang natia o jembia liasü.
Iba sentong Additional Director, IPR, Limawati Ao-i ketdang asü aser DPRO Peren, Simon Telia-i district ketdangsertem tenüng nung o jembi.