Khel Ratna sempet atema Sindhu & Sakshi shimogo

New Delhi, August 22 (Agencies): Yasüng, Deobar aonung tembangba Rio Olympics 2016 nung silver medal agizükla, PV Sindhu aser bronze medal agizüker, Sakshi Malik na nem Khel Ratna sempet agütsütsü renemogo.
Khel Ratna ya India nung agütsüba saisapongtsü sempet tematiba lir.
Sindh-i badminton tetoktepba nung silver agizüka, India tenüng nung Olympics badminton silver agizüker mezüngbuba tetsür asayar aküm aser Sakshi-ia bronze agizüka, tetsür melangteptsü tetoktepba nung bronze medal agizüker tetsür melangteper 1 buba küma otsü tasen yanglu.
Sindhu o Sakshi na den külemi, gymnast Dipa Karmakar aser prangpong toktepa kashishir, Jitu Rai na tenünga Khel Ratna sempet agütsütsü asoshi shimer asayar tenüng tarensen nung densemogo.
Tan Olympics nung Karmarkar-i tera agi tetsür vault bronze magizük saka lai Olympics gymnastics tetoktepba final nung shilem agitsü jenjang angur mezüngbuba India asayar küma otsü yanglua liasü.
Commonwealth Games champion, Jitu-ia prangpong kashishitsü tetoktepba final nung shilem agitsü jenjang angu saka pai medal-bo magizüktet.
Ano külen, 2016 Dronacharya Award agütsütsü asoshi shimer coach 6 rong nung Karmakar’er coach, Bisweshwar Nandi-a densema lir aser Arjuna Award agütsütsü asoshi asayar 15 tashi shimba osang angazükogo.