Khelo India sentong kübok Nagaland nung football ground 100 yanglutsü

Kohima, May 14 (Agencies): “Khelo India” sentong kübok Nagaland nung asayadak ground 100 yanglutsü asoshi maongka nguogo.
Iba dak sendakba nung Union Ministry of Youth Resources and Sports (YRS)-i state sorkar dang iba ita tsüngda nung Detailed Project Report (DPR) agütsütsü asoshi tetuyuba agütsüogo, ta Parliamentary Secretary for YRS Nagaland, Khekaho Assumi-i, Prodigies Group-i ayongba 3buba Open Penalty Shoot-Out Tournament lapokba sentong nung metetdaktsü.
Assumi-i ashiba agi, State YRS Department-i asayadak groung 100 ka atema DPR iba ita tatemibo agütsütsü asoshi renema lir. Item groung tem state kübok district ajak nung yanglutsü. Iba ajanga state nung ‘sports infrastructure’ renlokba nung shilem tuluka agitsü, ta paisa ashi.
Paisa ashiba agi, department-i ano asayartem atema tanga sentong aika renemja lir, item rongnung; grant in aid, capacity building programme aser kicha nema teyari agütsütsü asoshi densema lir, anungji asayartemi item maongkatem tejakleni arua agitsü asoshi imlaba pai lemsatep.
Takümküm Kohima mesüra Dimapur nung All Nagaland Futsal Tournament ka akatsü parnok sentong aliba pai lemsatep. Iba asayamong nung District shia nungi asayar telok anana-i shilem agitsü.
Iba dak sendakba nung senden ka June ita hopta mezüngbuba tashi nungbo agitsü.
Aizawl FC-i I-League akokba tenüngsanga pai ashiba agi, iba ajanga northeast nung football asayaba inyakyim khenyongi melenshiogo.
Maneni pai ashiba agi, youth resources & sports department den külemi asayar isheka June nung Mizoram sorkar-i asaya balala dak sendakba nung inyakyim asadangtsü asoshi Aizwal-i aotsü.
3buba open penalty shootout asaya osang:
Champion- Methele, parnoki senpet sen 30,000 agizük. Iba senpet Vuto Motors-i agütsü.
First runner-up- Snipers parnoki senpet sen 20,000 agizük. Iba senpet N.V. Press-i agütsü.
Second runner-up- Zavi’s Club parnoki senpet sen 10,000 agizük. Iba senpet Modicare-i agütsü.
Forth place- Shaleko FC parnoki senpet sen 5000 agizük. Iba senpet Active Station-i agütsü.
Best goal keeper- Methele telok nungi Leketoulie Liezietsu pa nem senpet sen 5000 alang gift coupon ka agütsü. Iba senpet Active Station-i agütsü.