Khen ashioktsü saka anabenbo mashiokdaktsütsü: NPCC

Dimapur, February 20 (TYO): MLC aser BJP Election Manifesto team züngsem Dr. Sanjay M. Ram Paswan-i Lok Sabha Election sülen Naga yimten latettsü ta nangzükba ajanga election matongdang telemtetba kecha magitsü sayur, ta NPCC president K. Therie-i ashi.
Dr. Sanjay ya BJP lennir tejen ka lir anungji pai Nagaland-i marudang BJP tongti lennirtem den asüngdangyar alitsü, ta pai ashi.
RSS-i Uniform Civil Code aser Hindutva alizüng atongtsü merangba dak alaka regional khurettem atema tebilemba kecha mali ta Congress-ibo bilemer. Ajisüaka, taoba mapang Congress-i telemtetba aika agiogo, ta Therie-isa shisem.
“India sorkar o Naga yimten teloktem tsüngda olemtepba agi onoki tebang mair. Tetsükdaktsü aser khurettem liaka tang tashi nung olemtepyonga aruba atema tenüngsang agütsür, ajisüaka küm 21 tashi telemtetba kecha magii olemtep dang aliba yabo tim masü aser nübortem ojang dang timtemdaktsütsüla” ta paisa metetdaktsü.
Iba jagi Congress-i maneni yimten tebilemtsü angatetteptsü atema timi aser linük temzüngi melaba ama mapa inyaktsü lemtetogo. Onok nem dang maongka agütsür, onoki inyaktsü, ta NPCC President-isa ashi.