Khen or semdangang, naia opet onütsü!

~ Sashimeren Jamir
Atangji nisung taküm kaji am tesa agi dangbo malir ta ashiba o nung aikati amanger. Mapa meranga inyaker kidang chiyungtsü tajung awazüa chia jema kazüba agia khenkhenbo alaker. Kechiyong meimchir taküm nungji iba kisüng jagi tepela mepirir, aji oda, pur medemer den mesüra pei kibong anir khenkhenbo meta tasen penzüa tangu sadoka südoksünema kazütsübajia nüngdaker.
Tangu sadoka kazüdak tesem tajung ka ni nenok dang ashitsü. Iba tesemji aikati angashir alitsü akok saka ishikati dang odanger alitsü. Iba tesem jagi menur ang otetba atema ni kanga sasaa bilemer. Kechiyong yangji mopung tanep, anü talem, ayongtzü temerük aser temenungratsü süngdonglidongtem aser tanganütsü ozü sangnutem ola anga anisüngzüka kazür. Yangji kazüdang mapang indokba memeteter. Yangji kazüdangbo alima wadang ajak amadoka kazür. Iba tesemji Yimchalu nung aliba “The Woods” indang ashirba. Yangji tongtibang tepuatsü kaji tzü waa kazüdak swimming pool (tzüwadak) tesadem tajung ka yanglua kar.
‘The Woods’ ya 2015 küm Süngratsü nunger lanur entrepreneur Sp. Adang Jamiri lapokba lir. Swimming Pool ka yanglutsübaji pa lanuwa nungi pungmanga aliba maparen ka lir, ta iba osangbeneri The Woods kibur den jembidang ashi.
The Woods lapokba nükjidong kar lemsatepdang, “ibai kü lanuwa pungmang ka atalokba dang masü saka iba tesem ajanga kija aser kibongtem südoksünema tangu sadoka aser pelatepa kazüdaktsütsü nükjidong nung tenzükba lir”, ta ashi.
‘Nisung aikati tzü ya kanga tsübur, anungji, iba tetsübu koktetba den tzüwatsü sobaliba tenzüktsü tejangraba lir’, ta pai ashi. Iba tzüwadak tenzüker külen pai nisung noklang pungu (500) dak tali nem tzüwatsü sayuogo aser ano tejangrartem nem maneni taa magii angati sayua arudaki, ta paisa inyaka aruba kar lemsatep. Pa ya Mumbai nung alidanga swimming pool ka nung part time inyaka liasü.
‘Iba tesem ya süngdonglidong agi mekütbanga lir aser alima tzü-mopung wazüka ayutsü asoshi süngdonglidongtemji kümzüka aser wazüka ayutsü nisung shia khuret lir, anungji, iba nung shilem agir ka ama iba tesem ya “The Woods” jatetogo’, ta paisa ashi. “Süngdonglidongtemji ajaki meimtsüla”, ta paisa ayongzüka ashi.
Teinyaktsü wadang kar lemsatepdang, sangzü nung senzüba “Zip-liner” aser amungdak ki (lodge) yanglutsü tebilemba aliba ka lemsatep. Tang tanurtem atema swimming pool ka yangludaki aser tatsüka lir yangi aliba ango tzübo nung ango mesütsü lapoktsütsü, ta paisa shisem.
Iba tesem nung sound system nüngdakra anepalutsür, pei sasa chiyungtsü bener arua soruchioka chiyungtettsüsa chipo-aonpo aser nüngdakbatem teperi yuja kar, jilia shira yangji chiyungtsüa renemtsür, tejangrarbo yangji oa yipa camp sütettsü akok, projector, chairs aser nüngdakba osettsüsettem angutsü. Iba tesemi arur nisung shia senpak 100/- dang agir. Anogo tepiyong amshinüra kenü nung sen 5000/- agir. Yangi senden balala katettsü aser ibai family outing, picnic, wedding photography, karaoke aser party ayongtsü tesem tajung ka lir. Osang tajung kaji; arogo/CYE telok atemabo 50% discount sütsür.
“The Woods” ya Mokokchung town nungi kilometer 15 shi pilar lir. Asenoki metettsüba kaji; ibai Hombar-Honibar (Monday-Saturday) anepdang 8:00 nungi aonung 6:00 tashi lapoker aser Deobarnübo nikong 1:00 nungi 6:00 tashi dang lapoker. Kari danga iba tesem semdangnüra iba mobile number 8413884583 nung tongtepratepangma.
Tanü ni iba tesem indang ajakbo meshili aser ajakbo nia merasateter, anungji, ajagi khen or semdangang, naia opet onütsü!