Khensa yimtak konger anepalua yangluba ki lapok

Khensa yimtak konger anepalua yangludak aser konger yanglutsü tesayuba agutsüdak ki ka Mokokchung Additional Deputy Commissioner, Chumlamo Humtsoe-i (tachichi nungi pungobuba) lapoktsüba sentong nung konger koma yanglutsü iba indang inyakyim rasa-a züluba kaket Khensa Aluyimer Telok-i adokba sayatsür kelen tangokba noksa nung angur.

Mokokchung, Aami/June 9 (TYO): Khensa yimtak tanü konger anepalua yangludak aser konger yanglutsü tesayuba agütsüdak ki Mokokchung Additional Deputy Commissioner, Chumlamo Humtsoe-i lapoktsüogo.

Yimtaklirtem, talisa tetsürtem kidang dang inyaka sen aahtsü asoshi Khensa Aluyimer Telok, Khensa Sensotsür Mungdang aser Khensa Women Ministry-i achayanga konger anepalua yanglur ayoktsü mapa ya inyaktsü pangjem aser 2018 küm nungi asalendonga aruba tanü iba sentong ya asangsang nung tenzükogo.

Tanü iba sentong nung Mokokchung Additional Deputy Commissioner, Chumlamo Humtsoe-i jembidang, Naga nungeri pei achitsü asoshi kecha peria mezüsenteter, tangar state dak dang metaloker alir, asenok peria chia jema litettsüsa ali peria lir aser tzü mopung kanga dang tajung, anungji item temoatsütemji amshiteta asenoki züsentettsüla, ta ayongzüka ashi.

Paisa Naga nungeri ak shi kanga achir saka ak metsütsübo temolung magütsür, Covid aruba mapang nung chiyungtsü agi anüngba asenoki metetogo, anungji akoktsüba maparen nungbo tezü metangi inyaktsüla, ta ashi.

Mokokchung district nung dang masü saka Naga lima nung yimtsüng nung tazünger aser tulur aika alibaji Khensa yim ya-a ka lir, item tazüngertem aser tulurtem jagi yimtsüng nung aliba nüburtem yaria inyakba angudang ya Naga nunger asoshi tangazüktsü tulu lir, ta ADC Mkg.-isa ashi.

ADC Mkg., Chumlamo Humtsoe-isa Khensa nungeri konger yanglubaji takok ngua inyaktettsü aser nübur ajangzükdaktsütsü asoshi kanga dang meranga inyakang aser Khensa yimtsüngji Konger Yim (Mushroom Village) ta sangdongtettsü merangang, ta adenshia aliba Khensa nungertem ajungshia ashi.

Kasa sentong nung Tsüngrem lenisüba jazüka Khensa Baptist Arogo Pastor Rev.K.Temjen-i sarasadem aser Dr.I.Amenla (Retd. Joint Director, Dept. of Agriculture); B.Imti Tzüdir, District Agriculture Officer & PD ATMA, Mkg.; Temsümongla ,tir, Khensa Sensotsür Mungdang aser Dr.Moa Walling (Retd. Joint Director Dept. of Horticulture) nungertemia shilem balala agia jembiba den Tongpangsenla, Asso. Pastor Youth, Khensa Baptist Arogo ajanga sarasadema tembang. Iba sentong nung menden Dr. Sashiyangba, District Project Officer Dept. of Land Resources, Mkg. liasü.

Khensa nung tanü Konger yangludak mesemtetba ya sorkar teyari kecha magi Khensa nunger sarutepa tenzükba mapatong ka lir aser Naga lima nung pei sasa konger yanglutsü tenzükba ya tanabuba yimtsüng lir. Parnok achaayanger kari ashiba agi konger ya yangluteta Mokokchung nung peria yoker kelen dangar district-tem nung agütsütsü tebilemba lir.

Iba mapatong nung aluyimertem, talisa Self Help Group 10-i tongti shilem agia inyaktsü, ta ashi.

Iba sentong temer konger koma anepalua yanglutsü, iba asoshi tesayuba sentong (Technical Session) ana (2) tashi nung tesayur mongintemi agia liasü.