Khensatsürtem rajemshir tejakleni aotsü nükla yur shisatokdener

Khensa yim, Rongjui/September 14 (TYO): Khensa Baptist Arogo Women Ministry-i ayonga taküm agi anabuba Khensatsür shisatokden senden ka “Rajemshir Tejakleni” omen dak rangloker Khensa Baptist Arogo sentep kidang mungdar.
Tanü mezüng senden sentong nung tongti o jembir, Dr. Imlirenla Walling-i omen nung ajemdaker jembidang, tetsür kati tetsür temeden aser jenjang mangatet tashibo tetsür ka khuret memetettsü aser tejakleni moutettsü, ta ashi.
Laisa iba dak sendakba nung ashidang, pei ayak (identity) aser senso (citizenship) ana ya khenyongi balala lir, anungji, tetsürtemi ibaji bendanga metetba den tetsür jenjangji kanga jangjajangja ayutsüla, ta metetdaktsü.
Sobaliba aser tetsür indang lemsatepdang, sobalibaji tensa mapang den apet melenshia aor, anungji sobaliba koba tamajung aser mapet lir aser koba sobalibai loktiliba tejakleni moudaktsüi rajang kümdaktsür, itemjibo melenshitsüla, ta laisa ashi. Aji saka, sobaliba tajung kobasa lir, itemjibo wazüka ayutsü tim, ta laisa shisem.
Lokti ka tejakleni aotsü atema tetsür-tebur ajaki shilem agi nung dang iba nungji lirumedemji adoktsü, anungji alima yanglutsü atema tetsür-tebur aroki telemtetba agiba nung shilem agitsüla, ta laisa tatishitsü kar bener arua tebilemba kar lemsatep.
Lai tetsürtem dang rongsenkettsüng renlokba nung temulung agütsütsü asoshi onük kar lemsatepdang, tangar dak dang metaloka ali tashibo asenok kodanga tejakleni moutettsü, anungji azümesen melii meranga inyaker pei sasa noktaktetba tetsür kaka asütsü ajungshia liasü.
Laisa inyakdaktsünüba o kar ashidang, tanü alimai mozü medeni züsentetba chiyungtsütem dang bushir, anungji iba nungji temulung agüja alu meranga ayimba den business balala tenzüktsü asoshi ajungshia liasü.
Sorkar mapa ajakibo mangutsü, anungji pei sasa mapa bushia pei tepok sünger ang ano asenoki tangar nem mapa inyaktsü maongka agütsütsü nükjidong yur inyaktsü asoshi tayongzükba ka agütsü. Pei chirnur danga parnoki kechi jangrar iba nungji dang ajungshia züngdaktsütsüla, ta laisa shisem.
Tsüngremi tetsür nem yangertetba sempet balala agüja lir aser tanü tetsür sempet aser tashi medeni alima tejakleni moutettsü aser alimai tetsür dak nungi imlar, ta laisa ayongzük.
Iba shisatokden senden ya Sept 16 tashi akatsü aser iba ya küm asem nung khen ayonga akar. Iba senden nung tesem balala nungi Khensatsür aika arua shilem agia mungdar.