Khiamniungan nungeri Hokah benjung amung

Dimapur, January 11 (TYO) : January 8 & 9, 2016 nung Noklak kübok Nokhu headquarter nung Khiamniungan nunger Hokah benjung amung.
Iba benjungmung ya Nokhu Range Public Organisation (NRPO)-i ayongzük aser tongti tesemdangrji Health & Family Welfare Minister, P. Longon liasü.
Iba sentong nung tongti tesemdanger o jembidang Minister Longon-i NRPO nem tenüngsang agütsü.
“Kanga dang tobur tajung Nokhu tesem nung NRPO-i iba benjung ayongzüka amungba atema parnok nem tenüngsang agütsür aser asen maitsü mesamadaktsütsü atema asenoki sobaliba wazüka ayutsüla” ta pai ashi.
Iba sentong nung Minister Longon den kinungtsü, department officers aser lokti balala nungi lennirtem aika aden.
Sentong nung Head GB, Aniangan Village, Mohgtei-i Hokah benjung teratet metetdaktsü, ADC Noklak K. Mhathung Tsanglao-i o tatsüka jembi aser Kengniuking teloki ken ka aten.
Iba benjung shibangba sentongji January 9 nü agi aser Land Revenue, VG, Women Resources Development Parliamentary Secretary, L. Khumo-i tongti tesemdanger ama shilem agi.
Hokah benjungmung nung Nokhu, Nokhu Noking, Choklangan, Langnok, Nokhu Range Noklak, Kingniu, Aniangan aser Kingpao nungeri sobaliba dak sendakba shilemtem agi aser Nokshio band o Choiphen Langpha band nungeri ken ajanga shilem agia liasü.