Khriehu-i Kohima College nung Commerce section semzüktsü

Dimapur, April 24 (TYO): April 24, 2017 nü Kohima nung State Lotteries & Music Task Force Parliamentary Secretary, Khriehu Liezietsu-i Kohima College nung Commerce section semzüktsüogo.
Iba sentong nung jembidang pai, kaketshirtemji tebilemtsü koktetertem, tazüokba nung intetertem aser aso 21buba atema renema alirtem asutsü atema shisaliok tajung agütsüba nung tesayurtem, non-teaching faculty aser kaketshirtem ajak teinyaktsü mapa lir, ta ashi.
Paisa, iba college nung commerce section tenzükba ajanga college tejakleni otettsü aser tarutsü nung commerce graduates aika adoktsü, ta metetdaktsü.
Kohima College, Kohima Principal, Dr. Watijungshi Jamir-ia mapang tatsüka tsüngda iba building renema yanglutetba atema tesayurtem aser tanga staff tem dang pelaba metetdaktsü.
Paisa, commerce building ya sen lakh 18 indoka yanglu, ta metetdaktsü.
Pai ashiba agi, Kohima College ya 1967 küm August 9 nü amenok aser iba ya Kohima village nungi mangdang tajung alirtemi state yimtiba, Kohima nung shisaliok riju ka nüngdak ta shisateta tentet.
Parliamentary Secretary-i college nem sen lakh 2 tenla den Keyboard ka tenla agüja liasü.