Khriehu Leizietsu-i tebu asoshi lenmang lapoktsür

Kohima, May 24 (TYO): Northern Angami-I Constituency nungi Nagaland Legislative Assembly (MLA) züngsem Khriehu Leizietsu-i Bodbarnü pa menden toktsüogo aser iba ya ajanga by-election atema lenmang lapoktsüogo.
2013 state general election nung Khriehu ya Northern Angami-I A/C nungi NPF ticket nung takok angu aser pa State Lotteries and Music Task Force indang Parliamentary Secretary teinyakdak nung MLA menden toktsü.
Pa ya Nagaland Chief Minister Dr. Shürhozelie Liezietsu’er jabaso tambusang lir.
Tanü NLA Speaker Dr. Imtiwabang-i MLA Khriehu-i züluba shidi agizük aser iba assembly mendenji tazüng ta metetdaktsü.
Tebu-i by-election nung tokteptsü aser Chief Minister maneni inyaka aotsü atema Khriehu-i MLA menden nungi alu, ta NPF otongdar, Achumbemo Kikon-i osangbener dang ashi.
State sorkari tetsür nem shilem lemzükja urban local body elections agitsü lemtetba anema nübortemi ola adokba ajanga T R Zeliang-i chief minister menden toktsütsüsa aküm aser iba sülen Dr. Shurhozelie Liezietsu-i CM menden melenzük.
Dr. Shurhozelie-i chief minister inyaktsü atema tenangzükba agidang pa NLA züngsem ka masü liasü aser iba jagi pai iba mapa inyakba sülen ita trok tsüngda election nung toktepa takok angutsüla, ta Kikon-i tanü metetdaktsü.
Iba by-election atema Dr. Shurhozelie aser Naga Peoples Front (NPF) renema lir aser Election Commission-i tekaratiba nung election agitsü anogo sangdongtsü atema dang atar, ta paisa shisem.
“By-election nung Dr. Shurhozelie-i takok tulu angutsü onoki imlar” ta NPF atema otongdar-isa metetdaktsü.