Khrista mesükba Khristanpurtem

~ R. Nukshi Aier,  Kuda Village (Nagarjan) Dimapur.

1.  Mapang ajak nung Khrista mesüka alitsü koda tajung,
Anogo shia kangki khuret abentsü koda tasak,
Alima jabujari majapangja mapatem –
Kati ka ashioktsüba, maochi aser tesempatem
Item yimya Khrista dakbo mali asü.

2. Khrista ama alitsü koda tajung,
Amanger talangka aliba Khristanpurtem,
Tema tereprangtsü dang asü!
Masü, temulungjang telungtiba nungi
Kechiaser Khristai tasüngtet molungsentsü aginer.

3. Khrista mesüka alitsü koda tajung,
Na aolen lenmang ajak nung, kechi nung lidir!
Bilemba, jembiba aser mapa aisü nung,
Ajemalua taremzük agi temeim nung-
Itemi dang Khrista jakla jilujirtem lir.

4. Khrista mesüka alitsü koda tajung,
Pela-a sadoka alidang dang masü-
Saka maksü, timtem aser tekangshi
Molungzürep, tejashi mangyim nung-
Khrista ama aremzüktettsüla.

5. Khristai sayuba koda tajung,
Pei tangbo pi taoba, kiyonger pei ama meimba-
Tsükchirtem dang aria bilemba,
Ochi nung tenüngsang agütsütepa
Süngkümbong temesüba nung jajatsü, koda tasak!

6. Khrista mesüka alitsü koda tajung,
Tiyazü kulitem angashiaka,
Temesepa agi maochi-e rishikangshidang-
Item menen pungitsü timtem aremzük-
Tsüngremer ajaso chir – Yisu Khrista-i.