Khrista Shisatsü Alima Tashitemetet Agi Angatettsü Makok

– K.Imliyanger Jamir, Eralibill Dimapur

Khrista mangatetba purtem asoshi Khrista otemji amajok, kechiyong Khristaji Tsüngrem tashi agi shia arudaktsü ta parnoki mamanger. Alima shisatsü agi Khrista shisatsü metettsü makoker, iba ama tamang mesüra yimsü amangba agi dangbo Khrista shisatsüji mangatettsü. Kechiyong tetongdangba ka lir aji agien nung dang ,Khrista shisatsü otemji angatettsü akok. Khrista dak chichia amang nung iba tetongdangbaji agiener. Khrista dak amang nung Tsüngrem tanelai asen tanela nem tangatetba agütsür.
Tenük nung aina tangok nung dang kechisearena jangjaa anguba ama, Khrista shisatsü angatettsü asoshi Pa nungi tashi ka nüngdaker. Kechiyong Khrista shisatsüji Tsüngrem miim o lir. Yihuda nunger yimsüsürtemi Tsüngrem miim oji mangatetba agi asen Kibuba Yisu parnoki kangki nung angenloka südaktsü. Yisui kangki nungi yamai ashi, “Oba parnok dang tai tokang, kechiaser parnoki kechi inyaker aji parnoki memetet.” (Lk 23:34) Anungji Yisu dak amang nung Tsüngrem tanela ajanga pa shisatsü angatettsü asoshi asen tanela nem tangatetba agütsür.
Tashitemeteter shisatsüji pa tsüngdang amajok asünung pai tashi temeteter shisatsü samatsür. Greek nunger Pluto aser Socrates dang nungi Yisu o tesashiba liasü. Kechiyong Ploto aser Socrates oji alima shisatsü liasü, saka Yisu ojibo Tsüngrem shisatsü. Anungji Khrista shisatsü aser alima shisatsü khenyongi balala.
Nisung shiba Tsüngrem tsüngdang temsüa lir paji Tsüngremi shimtet. Saka paji alima shisa makabatem lir. “Kü adianutem angangjo, alima nung shir sensakertem lir, Tsüngremi parnok tamang nung takartem kümtsü aser pa meimertem dang Pai nangzükba yimli senmang amangtsü meshimtet ama?” (Yak 2:5)
Shisa makabatemji kecha maka amai, saka ajak kar. Kechiyong parnok tamang nung takartem asunung Tsüngrem yimli senmang parnoki amangtsu. Tenyar Paul mapang nung Rome yimli nung tenlaki maka amai züngshi saka tesülenbo Rome yimli ajak nung tenlaki züin, aser Tsüngremer arogoji züin aser tanü tashi mesamai lir. Tsüngremi tashi maiter aser shisa makabatem shimtet, itemji shisa takar kümdaktsü. Kechiyong parnoki Khrista shisa taka angateter. Kechiaser parnok dak Khrista tanela lir. Saka shiba dak Khrista tanela mali, pai Khrista shisatsü angatettsü makok………… “shiba dak Khrista tanela mali, paji Pa meyong masü.” (Rom 8:9_
Aji oda, alima tashitemetet shisatsü agi Tsüngrem sentong   angatettsü makok. Tanela len nungi dang Tsüngrem sentong angateter. Tsüngrem sentong angatettsü onsara takar, pa sentongji meilongi dang angateter. Tanela temeshi ajanga dang Khrista shisatsüji angateter. Tanela temeshi agi dang Tsüngremi Khrista shia arudaktsü ta asen tanela nem temetetba shisatsü agütsür. iba tanela jagi tarutsü indang asenok dang metetdaktsür. Kechiyong khrista shisatsüji Tsüngrem ain aser Tsüngrem miim o lir. Iba khrista ajanga asenok Tsüngrem den lungjemdaktsü. Kechiyong Khrista shisatsüji Tsüngrem nungi, aser pa talangzükbaji asenok asoshi liasü. Anungji Khrista dak alirtemi Kibuba nung uludaktsür. “shibai uludir pai kibuba nung uludakjang” ( Kr 1:31)
Tatishitsü:-
“Ni shiranger atema tanebtsü meshia sarasadem nung shirangerji tanebtsü ngura, idangji ni ulutsü nüngdak mali. Kechiaser khrista kü dak lia pai shirangerji anebtsü nung ni kibuba nung uludaktsür.” Aji oda Khrista tanela asenok dak aliba agi asenoki alima tashitemetetji Khrista nung amajok kümdaktsü, aser asen tanela den kibuba tanela lungjema ali nung asen tanela dang kibuba tanelai Khristaji Tsüngrem tashi agi shia arudaktsü ta angatetdaktsür. Anungji asenoki kibuba nung uludaktsütsüla.
Tsüngrem shisatsü miima aliba agi asenoki tesadang dang meteter aser tesadang dang angateter. Saka asenoki Tsüngrem yimli aser pa temeshibaji bushijen bushi nung asenoki pa shisatsüi meilongi tali metettsü, saka kotak nungbo aseni ajak metettsü. Tanela nung malirtemi Tsüngrem shisatsü miima alibaji angatettsü makoker, kechiyong tanela temeshi tashi ajanga dang Tsüngrem shisatsüji angateter aser metetdaktsür. Anungji chichiba tamangertem dak Tsüngrem shisatsü jungkai adokdaktsür. “Khristaji Tsüngrem shisatsü” (I Kr 1:24).
Khrista alimai arudang Tsüngrem shisatsü dener aru. Anungji Tsüngrem shisatsüji alima nung jungkai adokdaktsü. Saka tashitemeter aika tsüngdang ibaji jungkai madoki miimbanga yua lir. Kechiyong parnoki Khrista shisatsüji  mangatet nung Khrista magizük. Parnok tanela tenük tapok kümdaktsü. Yihuda nungertemi Tsüngrem shisatsü memetetba agi Yisu kangki nung angenloka südaktsü. Kechiyong parnok dak tanela tamajungbai yimsü asü. Parnokji shirsa? Rome nung Governor, aser Yihuda nunger lenirtem liasü. Tanela tamajungbaji satan liasü. Khrista kangki nung angenlokbaji satan tashi ajanga angenlok. Saka Tsüngrem tashi, aser Tsüngrem ain agi Khristaji shia arudaktsü, Tsüngrem shsiatsü mangatetertemji molumi shilem angutsü, saka Khrista shisatsü angatetbaji tekümtet, teti   tatem maka taküm, aser sentsüwangshi. Ibaji pa meimertem Tsüngrem mulung metettsü makok. Kechiyong chichiba tamangertem dak dang Tsüngrem mulung lir, mesüra kümzükba purtem dak Khrista mulung lir. Koba tesüngmangtsü ochi o lir.
Khrista shisatsüji tanela temeshi ajanga asenok dang jungkai adokdaktsür. Kechiyong tanela temeshiji Tsüngrem tanela. Tanela temeshi tsüngdang kecha miimshitsü makok. “Anungji tanelai sayuba otem nung tanela tebilembatem tanela nisungtem dang rateta sayur”. (I Kr 2:13) Kü dak aliba tanelai dang kü tebilembatem metet, saka kü dak khrista tanela lira, iba tanela ajanga kü tanela dang kechisarena metetdaktsür. Yamaji Tsüngrem tanelai dang Tsüngrem bilembatem meteter. Anungji alima nisungi Tsüngrem tanela sempettem magizükteter. “saka alima nisungi Tsüngrem tanela sempettem magizükteter. Kechiyong itemji pa asoshi tamashi lir. Aser pai itemji angatettsü makoker, kechiyong itemji tanela tsütsü len nungi dang meteter.” (I Kor 2:14) kechiyong alima nisung dak tanela temeshi maka nung kechisa tanela temeshi ajanga arur parnoki memeteter. Tsüngremer tebilemba ajak tanela temeshi ajanga dang metetdaktsür. “shiba Tsüngrem meyong lir, pai Tsüngrem o angar, nenoki aji mangar kechiaser nenok Tsüngrem meyong masü”. (Yhn 8:47).