Khristan Ain Adokba

Ain adokba temenen tebenshi. Ne ain adokba manung anü teludaktsü.  – Efesa 4:26.
Ain adokbai Khristan taküm raksatsüba ama tanga mapai meraksatsür. Ain adokbai pei sasa azüokba samatsür aser asenoki tanga mapang nung meinyakba mapa inyaktsü ajungshir. Maneni ain adokba lira, ibaji taku akümer aser asenok mulungjang nung tajung bilemba ajak chimar. Laishiba nung tamangertem dang maneni ain adokba indoktsü aser shi jangraba temenentem rong nung ka ama züngshitsü sayur (Efesa 4:31).
Efesa 4:2 nung shia aliba o amshia asenoki asenok ain adokba metentsütsü aiben meranger! Yisui ain adokba tenla ki meshitettsüba “temeshi ain adokba” ta kuli agütsür. Efesa nung temenen menaba ain adokba indang ashir. Yisui temenen memenai ain adoktsü koka liasü. Kodang Yisui tenla ki meshitettsü, Yisu ain adoka liasü ta Laishibai mashir (Mathi 21:12-14; Mark 11:15-18; Luke 19:45-46).
Laishiba agi asenok ain adokba metentsütsü merangba asenoki kümdangtsüla. Efesa 4:31 nung ain adokba ajak indoktsü asenok nem ozüng agütsü. Iba tetezü ochiba asoshi asenok tangatetba mesüra tejangraba ajak makatsüla ta masü. Iba tetezü koba agi asenok temenen menadaktsür item temenentem indoktsü ashir. Ain adokba agi Tsüngrem telangzükba mapa bener marur; iba yagi Tsüngrem mapa tsükdanger.
Mapa kar nung na temeshi ain adoker ta nai bilemra, ne mulungjang nung temenen memenai ain adoker asü masü shisadangang. Ne ain adokba jagi na khristan kati mejembitsü o jembir asü masü mesüra tangar anema miim o jembia senzür asü? Ne ain adokba jagi nai Tsüngrem memeteti aliba yimya atemzüktsü adokdaktsür asü? Ne ain adok jagi kar dang Khrista mesük temeim mapa inyaktsü noktanger asü? Ne ain adokbaji nai shisadangtsüla aser iba nung temenen kar danga lira indoktsütsü Tsüngrem dang asüngdangang.