Khristan anemba telok !

Nagaland nung aser talisa Ao lima nung election ochishia timi agitsü asoshi ABAM-i inyaka aruba sentongtem rongnung tongtibang aser tesashi kaji yashi deobar anogo nung ABAM kübok aliba arogo ajak nung temoatsü sentep mapang ‘Clean election’ onük jembia ‘Clean Election’ ken sayaba sentong ya ka asütsü. Iba anogo nung arogo shia nung sannükertemi ‘asenoki shimtetba government-ji asen dak alang asütsü,’ ta jembiba onükji amangba purtem ajaki hauni ta angateta agizüker alitsü ta amanger. Asen lima nung election junga agitsü asoshi ABAM-i inyakba rongnung tesem balala nung tangatetba agüja jajaba den ano tang ya ghonda meyirijang tenet maneni sarasademba sentong ka arogotem melentepa agia odagi aser ano election nung ochishia shilem agitsü nangzükertem kibong shia nung nisan temesüng songa ayutsü tenzükogo. Iba tongpang ya tesashi ka lir. Tang tashi nung asenoki tashiyim agi aser sen yong vote yoka election agiba ochimashi mapatem ajak ya alima ozüng dang masü saka Tsüngrem anema inyakba mapa ka lir, anungji election junga merüka agitsü asoshi inyakba ya tanülar tongpang ka asütsü. Aji oda, ABAM-i Clean election ken tashi mejema tesem ajak nung election merüka aser timi agitsü ayongzükbaji kokra ojang aser makokyonga ojang ta bilema tenzükba tongpang ka masü saka kechisüdirsüaka akoktsüla ta ser tenzükba tongpang ka asütsü. Ibayongji, ABAM-i mejemba ken nung ” Khristan yimsü anemba telok nembo vote magütsütsü renemang,” ta tayongzükba tuluka agütsüogo. Iba jagi asenok amangba purtem karbo temulung yirua alitsüa akok, kechiaser iba telok nem vote agüjang aser iba telok nembo vote tagütsü ta ashitsübaji ABAM shilem masü aser Clean Election asoshi jembirtem mapa-a masü ta bilemtsüa akok. Ajisüaka, jungjunga bilemdangra, kodaser ABAM teloki Aor tamangertem dang Khristan yimsü anemba telok nung adentsü ajungshitsü mesüra iba telok nem vote agüjang ta ashitsü. Shitakba agibo vote magütsüba dang masü saka Khrisan anemba telokbo  tagizük ta ABAM-ibo ashitsüla. Atangji, Khristan anemba telok anema ABAM ama Khristan telok kati tashiyim mapa inyakra, ibajibo tai asütsü saka pei nütsüngtem kümdangshidakja mamangba purtem sülen moatsü asoshi metetdaktsübajibo tim dang lir. Arogoji tatsük süra tatsük aser temekong süra temekong asütsüla, anungji tanü ama Khristan-tem tsübudakja reshikangshiba mapang, parnok den adentsü asü madentsüar, iba tesayubajibo arogoi jangjajangjaa metetdaktsütsüla. 1970s mapang Naga limai Communist telok arutsü amai olulu liasü, anungji arogoi iba Communist telok anema nokdaktsü asoshi ajak nem tangatetba agüja jaja. Iba kasaji tanü Khristan anemba telok anema ola adoktsübajibo ABAM teloki inyaktsü tim ka inyaker asütsü. Aji oda, Khristan anemba telok anema ABAM teloki o ka danga meshitetra asenoka parnok den kasasa Khristan yimsü anemer akümtsü. Tanü Khristan anemba telokibo tenla ki raksatsür, amangba purtem tanaben kangshia limapur kümdaktsür aser chiyongtsü tashi nung tebang aiter. Ajisüaka, Khristan telokibo yamaji inyaktsü makok, ibayongji Nagaland nung Khristan-temi tanga yimsü amanger tenla ki raksatsüba osang mangashir. Aji oda, Khristan-temi Khristan anema inyaker dang mepelaba sayutsübaji parnok nem vote magütsübaji asütsü. Tanü ama arogoi Khristan yimsü anemba telok anema ola madokra, Nagaland nung Khristan yimsü samatsü ana nung lir, kechiyong Naga nunger ya rongsen nung sensaker,  tamang tila aser yimten  nung tangatetba mali shilem agiba purtem lir. Iba jagi mashi nem mesüzükdaktsür. Atangji, tashiyim inyakba aser ochimashiba mapatem ajakji Khristan anema inyakba mapatem lir, anungji item nisung aser telok nem Khristan-temibo vote magütsütsüla. Aji oda, shibai Khristan yimsü anemba telok anema ola madokdir, pa mesüra laji Khristan anemer asütsü !