Khristan dangi meyipdaktsüba atema nisung ka kou ongtoktsü

Orai/Lucknow, January 30 (Agencies): Nisung kati Hindu nunger tebur asem Khristan yimsü dangi meyipdaktsü aser parnok nem nashi shi kangshia chidaktsü, ta tai tonglokja Hokolbarnü Uttar Pradesh, Orai district nung telok kati nisungba kouji ongtokja tsüngsem agi azük yanglua azükdaktsür yimdong süa jaja.
TOI osang ajanga ashiba agi, nisung kati Hindu nunger asem Khristan yimsü dangi meyipdaktsüba sülen nashi shi kangshia chidaktsü ta osang angazükba sülen Bajrang Dal züngsem kari pa kou ongtokja tsüngsem agi yangluba azük  azüktsür yimti yimdong süa maksüja jaja.
Ano tanga osang ka ajangabo, nisung 200 jungnüa Uttar Pradesh, Jalaun district kübok Randar nung aliba Awdhesh Savita’er kidangi aoba sülen pa kangshia Orai-i anir aru.
“Bahrang Dal züngsemtemi Awdhesh kou, nüksemo aser bangsemo ongtoksüba sülen yimdong süa anir jaja,” ta kasa osang ajanga ashi.
Iba tatalokba dak sentakba nung police-i ken o asem benokogo, ajisüaka tang tashi nungbo nisung shinga pua mali.

You must be logged in to post a comment Login