Khristan dangi meyipdaktsütsü tasa yangluba nung Mother Teresa dena liasü

Basti (Uttar Pradesh), June 20 (Agencies): Mangatettep onük ka akümtsüsa BJP MP, Yogi Adityanath-i, “India nung Khristian yimsü dangi meyipdaktsütsü atema tasa yangluba nung Nobel Prize angur, Mother Teresa-i shilem agiogo,” ta ashi.
“India nung Khristan yimsü dangi meyipdaktsütsü atema tasa yangluba nung Teresa-i shilem agiogo. Khristan yimsü dangi meyipdaktsüba tatalokbatem ajanga Arunachal Pradesh, Tripura, Meghalaya aser Nagaland densema Northeast tesemtem nung telungpur maparen adok,” ta Gorakhpur nungi MP, Yogi-i ashi.
Honibarnü Uttar Pradesh, Basti nung Ram Katha sentong ka nung jembidang pai, “Nenok ajaki NE (northeast India) indang tensa meteta lir. Nenoki ibaji semdanga tensaji reprangdangtsüla,” ta ashi.
Yaküm küm RSS tongti, Mohan Bhagwat-ia, “Mother Teresa-i sensakertem yaribaji parnok Khristian yimsü dangi meyipdaktsütsü nükjidong nung inyak,” ta jembiba sülen aikati iba oji ashishia liasü.