Khristan kibong nung kaketnang (Library) koda ayutsü aser tajangzük. (The role of a library in a Christan family and how to keep it)

– A. Shilu Ozukum, Aoyimküm, Dimapur.

Tanü alima temetetbaji ‘zenith’ tonga atuba putu aser 21 century nung asenok alir, meimchirtemi anü, ita, petinu nung oa alitsü merangba putu ka nung asenok alir ta asenoki metet, aser item temetetbatem ajak kaket azüngba aser züluba nung dang ajemdaker inyaker. Asenoki metet, shisaliokji shilem 95 bo kaket azüngba ajanga angur.
Kaketnang (Library) kaji tongtibangsa temeteter atema lir. Iba library jenjang (value) ya asen aortemi junga angatet nungbo koda temoatsü süla. Nai ner chirnurtem nem rongsen tulu rizünga meyutsütettsü akok, saka nai na azüngdang bendenba kaket temji almirah tulu tajung ka yanglur yangji bendena toktsü nung na süaka ner chir, semchirtem asoshi nüngo tulu asütsü. Na azüngdang anguba kakettem aika tanü putu nung mangur (out of print) ajidang masü jenjangjia nai sen 25 agi aliba to tanübo iba kesa kaketji sen 100 kümogo. Anungji magazine ka dang süaka ibaji kanga dang jenjang keta nai rizünga ayutsüla, aser ibaji mapang ka nungbo na asoshi kanga dang senti asütsü.
Kodang asenoki anüdoklen lima indang reprangdangdir kija indang kaketnangji million aika indang rizünga yua lir, aser yangji makamaiter chirtem aika library fee ita shia agütsür azünger iba nungjagi pa mesüra la degree tajung angur. Ajidang masü par library ajanga sensaker chirtem aika nüchi kümdaktsür, yamaji sorkari ki tajung yanglur State library ama District library ama zünger mezüngma lapokja lir aser ibaji ajanga student aika tenük sak-a akümer.
Surapang, library ya koda ayutsü aser kong komala tesem ka nung ayutsü (?) Nai ner ki-ji apir takdang koba nung na kaket azüngdang minprong mesüi kaket züngtettsü, tesangwa peria aliba, mepong tajung peria aruba tesem asütsüla. Na kaket ayuba almirah-ji takdang balala keta yanglutsüla. Item takdangshiaji yamai ayutsüla- Theological Books balaka nung, Doctrinal Book balaka, Devotional Books balaka, Arogo otsü kakettem balaka nung, taküm otsütem kaket balaka, Tamangba yimsü kakettem balaka, sangro ama, jilushi ama, Fiction, Novels ama, essay & Letters, Magazine amala, aser kokra kaket shia ji serial number zülura na kaket bushidang tim-matemtsü, mesüra nai koba kaket, koba kaket aginer nai yakta dang agitetettsü.
Tanu Aortem nisung aika degree tajung ngur mapa inyaksagi saka pai mesüra lai zünga aruba kaket ka danga yua mali. Degree ngurji ta sür temolung lemer alibatem aika angur. Anungji iba ya zünger kulen danga nai temolung aguja nü kija library-ji tilaka danga tenzükra iba jagi na aser ner chirtem kanga dang temoatsü asütsü, ta ayongzüker.
Library koda anepalutsü:- Kaketji meseni machitsü atema mapang shia sü mozü aser mesen asüba mozü inoktsüla. Aji dang masü kokra mapang shia kakettemji anü nung ghonda 1-2 shi aputsüla, aser sü temeruk ka agi anak auyi indoktsüla.
TEBILEMBA KAR YAMAI AGÜTSÜR:
1. Library-ji nü kijai lapoktsü akok, Nai khenyongi kaket aika malitetra itasen angubashia kaket ka mesüra ana alitsü akok, mesüra nai küm nung library atema budget yanglutsü akok. Tatishitsü agi nai küm nung sen 1000 nungi 2000 yura iba jagi küm pongu nungbo kaket tajung aika alitsü akoktsü.
2. Tanabuba nung Arogoia iba kaketnang ya ayutsü akok. Küm shia budget nung sen 5000/- danga ayunung mesüra ner Arogo nungi tulur temeteter dang Arogo library atema kaket tajung kaka tenla meshi nungbo iba jagi ner Arogo kaketnangji züintsü, aser yangji sensaker chir kaket malitetertem aika arua item kaket ajanga shisatsü angutsü. Kechiaser libaryj i Hon atudak ka mesük. Library tajung ka melira Arogojia melamela-a dang süadoktsü, kechiaser tamendaktakji Arogo kaketnangji alitsü. Putusa putu melentepa aruba Arogo otsütem ner Arogo kaketnang nungji alitsüla, Doctrinal balala aketba kakettem ajanga Arogo nung sayuyim balala mesüra mangatetep kar adok nunga item kaket ajanga o bendang agütsütsü.
3. Tasembuba nung Student Union-ia iba kaketnang ya lapoktsü akok. Koma, kodasür, koba lenmang ajanga lapoktsü, kaketshir ajak nuboyoki (aayangi) aotsü akok, küm nung kaketshir shia kaket kaka sarutsü akok. Bendanglen alirtem tulur takar dang kaketnang atema tenla mesüra kaket meshitsü akok. Yamaji lenmang balala nungi kakettem bendena iba kaketnangji tenzüka yura tejangrartembo mapang amajok nung indoktsü melena iba ama library nung oagi anogo piyong shisatsü angazüktsü lenmang lir, ta tebilemba kar lemsateper.
Tsüngremi tazüngertem ajak moajangma.