Khristan Mayitsü/ Shisangren (Christian Identity)

–  Rev. S. Temjen Longkümer, Chumukedima.

Akhidangbo Ao o jembidang olong tongtibang aika nung English ojang enoksema jembi; kechiaser asenoki Ao O tetezü tapet bena marutet. Anungji asenoki Ao O ya kanga sensaker ta jembia liasü. Saka tawa-tanü nungibo asen Aori pei oshi nung ketasena akhidang asen tsürapuri jembia aruba O tetezü tarok aser tapet samar aliba aika bushiteta jembiba aser züluba angudang kanga pelar. Tanü shirnoksa iba wadang nung amtaka lir, maneni meranga inyaktsü ajungshir.
Tamalenbo asenoki Ao O jembidang English O ‘Identity’ tasa jembia liasü. Saka tangbo iba tetezü tapet bushiteta kari ‘Mayitsü’ ta jembir, kari ‘Shisangren’ ta jembir. Anapronglaji shitak ta bilemer. Mayitsü, tetezü tangar den mayiteptsü, jangja jangja metettsü. Sshisangren, tetezü tangar dang nungi naji shisang shisanga balaka jangja ajitettsü.
Tang, idakai shinüba oji ‘Khristan Mayitsü’ (Christan Identity) ibai lir. Ya kechi dang ajar? Ibai yimten tsütsü masü, mesüra sobaliba tsütsü-a masü, saka ya tamangba tsütsü lir. Ibai ne sasa tangar dang naji Khristan ka ta jangja sayutetba dang ajar.
Tali jangja angatettsü asoshi tatishitsü tila ka shidi. Na Khristan ka lir. Ne kiyonger anasatiba anaji ka Hindu, aser ka Muslim. Hindu nungerji lokti tekülem maka. Parnok kibong shia nung süngyanglu yua lir, aji külemer. Ano parnok dokan kinük nung süngyanglu yua aliba asenoki angur. Anungji asenoki ya Hindu nunger dokan ta meteter. Hindu nunger Mayitsü ji (identity) süngyanglu lir.
Yamaji Muslim nungeri Hokolbar (Friday) anogo nung dokantem shibanger par tekülemdaki aor. Anungji Hokolbar nü dokan shibanger aliba kiburtemji Muslim ta meteter.
Adianu, na Khristan ka lir. Saka ne kiyonger Hindu aser Muslim nungba tena jagi naji Khristan asü, mesüra Khristan masü-ar mejangjar. Kechiyong parnok kodanga Deobar/Amungnü tekülem sentepi oya mangur. Aji oda na Khristan Mayitsü (identity) ji nai ne kiyonger dang mesayuteter.
Khristan ka Mayitsü/ Shisangren (Christan Identiy) shitakba Temeshi Amungnü tekülem sentep nung atentsü aoba ya lir. Iba yagi dang naji Khristan ka ta jangjatsür. Anungji Khristan ajaki ya metettsü aser angatettsü nüngdaker.