Khristan Tekülem nung Ken

– Mr. Jongshimanen,  DABA.

A. Tejen lai
Isreal nunger lokti aser kija libaliru ajak nung ken agi tongtibang shilem agia lia aru. Parnok ken den tsüngkang densema liasü. Lalitha S. Kümar-i ashiba agi, ‘Laishibai Ken ya tembar ka shibai tasonü nungi tasünü aser teti tatem maka tashi asen den alir ka mesüka lir ta sayur,” Isreal nunger sobaliba nung ken kanga tongtibang süa Miriam takok ken nungi tenlaki dang tekülem tashi amshi. Tejen Lai ya sayubentsü aser tekülem ken angazükdak tajung ka lir.
Akhidang kentenba yimyaji mapang ka amshia azüngba (rhythmic chanting), aser tanen maka lepshia ojang kar atenba liasü, Oda liyonga arudang ken tapu balala puratet, tat. agi, mapa inyakdang, tamburtem nungi tanur dangi, yamala. Ibri nunger ken tejentibaji Lamek liasü. Laishiba nung mezüng kentenshiba ya Yubal shiba kongki aser jemji amshirtem tebu liasü (Lipok 4:21) iba nung angutsü. Yubal, Ibri nung ‘Yobel’ tetezü san tezü koba nungi jangzü yanglu.’
Iba ya Ibri nunger, Yihuda nunger, Tekülemdak kenten yimya, aser ainkar den kenten yimya bushiba ocet ka masü nung asenoki yimya ka agi dang item indang bushidangtsü. Agüja aliba yimyatem nung ken amshi: Tekülem, Takok anguba, Temenen aridokba, meshitetba, Tetushi aser Tenüngsang Agütsüba, Bendanga agütsüba, Tatok Nangzükba, yamala.
(i) Tekülem: Ozüng Süngden Abinadaber kidang bener adokba mapang nung Dawid aser Isreal nunger ajaki Kibuba madang ken aten (II Sam. 6:5). Hezekiai tekülemdak merüktet aser kentenertem shimteta ayu (II Putipuyang 29:25- 30). Ainkartem Isaiah, Amos aser Yeremia nunger ya ken tenertem liasü.
(ii) Takok Anguba: Mosa aser Isreal chirtemi Egypt nunger Temerem Tzüyim nung samar takok ken aten (Anitet 15: 1-21). Yihusua 6 nung Yeriko jara laoba ya tanga kecha masü saka jemji apuba ajanga lir.
(ii) Temenen Tanela Aridokba: I Samuel 16: 14-23 nung kodang Saul Chuba temenen tanela agi timtemdaktsü, Yesse chir Dawid-i kongki atem, ibaji ajanga temenen tanela aridok.
(iv) Meshitetba: Kodangsa tekülemdak meshitetdir ken ajanga Kibuba nem tenüngsang agütsü, idangji Kibuba Tanelai kiji asüng (II Putipuyang 5:11-14). Ezra-i ken tener aser kongki atemertem ayongdena tekülemdak yanglutsü tenzük dang aser yangluzüker külen tenüngsang agüja meshitet (Ezra 3:10-13).4
(v) Tetushi aser Tenüngsang Agütsüba: Tzü ngur külen Israel nungeri tetushi aser tenüngsang agütsü (Züng. 21 :17). Mosa Nebo tenemi matudang Isreal nunger ajak jatener Tsüngrem nem tenungsang agütsü (Deut. 32:1-43). Kodang Süki-i Ozüng Süngden bener aru Dawid-i Tenüngsang Ken ajanga Kibuba asangtsü Asaf aser adianutem nem Kibuba asangtsü shimtet (I Puti. 16: 4-36).
(vi) Bendanga Agütsüba aser Tatok Nangzükba: Jemji aser Jangzü apua tarungba tenla agütsü. T. Ken 51, ya tatishitsü tajung ka lir.
Aji oda süaka, Sobaliba, külem küja aser amongtsümong nung ken kanga amshia liasü. Pei jangraba mapa tamajung inyakba mapang nunga amshiba angur (Isaiah 23:16).
B. Tasen Lai aser Mezüng Arogotem Mapang
Dawid mapang nung tenteta yutsüba kenten yimya amshia liasü. Parnoki ‘tenüngsang ken, temeshi ken aser tanela ken agi sayua ajungshitepa taochi nung Tsüngrem dang aten’ (Kol. 3:16), (Efe.5:19-20). T. Mapa 16:25 nung, Paul aser Sila tepuokdak ayaterem nung sarasadema tanela ken tena tejangraba tulu nung Tsüngrern madang atenba angutsü, Timtem tepuokdak tashi angutsü asoshi ken atenba angur. Ken ya sapi amai tekülern lapoktsü aser shibangtsü asoshi amshiba angur, Mark 14:26, Kibuba Benjung mapang Yisui pa nutsüngtem anir ken atenba Matt. 26:26-30 nung angur. Nutsüngtem maneni tekülem nung temulung ka sür kentenba agi tongtibang shilem agiba angur (Acts 2:46-47). Tejentiba tekülem ken (hymn) Clement of Alexandria-i A.D. 170 nung mejem ta jembir.
C. Tenyartem Mapang (Apostolic Time)
Yisu alima nungi pilaa orr külen Tenyartem mapang nung Khristantemi maneni ken atenba ajanga lokti nung tajangzük tulu liasü, Tenüngsang ken atenba ajanga parnok jangratem angu. Mezüng arogo metenzükdang yongi ken tena liasü, anungji tekülem ken ama alima (secular) ken-a liasü, Monk aser clergy-temi dang ken mejem. Temeshi kenten ya tekülemdak tesem nung kentenertemi aten aser tekülem sentong nungi noksema liasü.”
D. Middle Age
Church music ya dang tezüluba nung liasü. Item ya arogo nung alirtemi dang anepalua tenyonga aru. Anungji, alima ken masü saka temeshi ken liasü. Iba mapang nung Carol kenten ya temeshi ken aser alimar ken ya tetsüngdai aitsü asoshi puratet.’ Iba mapang nungsa metong metonga atenba ken dang arogo ken aser ajungshia tsüngsanga (rhythmic dance) atenba ken dang alimar ken ta jaa liasü.
E. Reformation Aruba Mapang
Iba mapang nung ken ya kanga renloker temaba jenjang nung shisa lemsateptsü asoshi arogotemi amshia liasü. Tekülemba tesemtem nung kentenertemi tekülem sentong nung inoksema tena aru. Martin Luther-i ken ajanga Tsüngrem den direct tesendaktep katetba metet. Nungtugu quotation, “Why should devil have all the good tunes ?” ya aikati Luther-i ashi ta ashir. Pa ken mejemer, liberal aser reformer ka liasü. Ken ya tongmelang aser indangindanga mejemtsüla ta paisa ashi. Pai ajungshia chorale kenten yimya ya aso.” John Calvin-i ashiba agi, telok sentepa alir ajaki tentettsüsa dang kenji atentsüla. Atangji, Laishiba nung mamendakba ken kecha atentsü makok.”
F. Tanü-asüng Tekülem Ken
Tanü asüng tekülem nung atenba kentem ya teimba 19th Century British or Victorian hymnody aser 19th Century American Gospel song nungi lir.” 19th aser 20th century, hymns ya old style bushishiba aser new styles yangluloktsü asoshi liasü. Iba mapang nungsa Latin aser Greek hymn-tem English oshi nung meyipzüka tenshi aser gospel song ya tentet. Iba gospel kentemya D.L. Moody aser Ira D. Sankey nati alima ajak nung amshi. Gospel Music ya popular American hymnody nungi adokba 1870 küm adokba lir.”
Gospel ken ya pei taküm kuli nung amendak, indang-indanger, melamelar, tanganütsüka aser ajaki tentettsüsa mejem. Tekong nung ashiba otemji leplazü nung lepshia aser nenshia aten. Gospel ken movement ajanga tanga kenten yimya aika puratet; tatishitsü agi, Chorus, koba tatsü aser aiben lepshia atener, solo, duet, trio, quartet aser choir ken yamala. Item ya tanganütsü olasü aika adoka sentong dak peta mejema aten.”
Iba putu nung alirtemi tasen purateta tendangbaji aginer, aser music-ji medium ka ama amshir. Ken nungji beat aser rhythm tajung, melamela angazüktetba koba agi tanela aser shi ajak arakzüdaktsütsü akoker yamala dang aginer. Guitar, keyboard, drum, yamala musical osettem kanga sapua amshir. Iba ajanga ojang tongtipang masü ta mashir saka iba putui ola/ sound ajanga ken ojangji angatsü jangrar ta sayur.”
Tanü asen Arogotem nung reprangdangra, Western hymns, country, chorus, chorales, aser gospel music, yamala dang atenba angur. Loktiliba nung reprangdangra rock secular music kanga sapua amshiba angur. Tsüngremi asen Aor aser Naga nunger nem agütsüba kensu amshia Pa külemtsü nüngdaker.